«3+3» ձևաչափը անցել է ժամանակի փորձությունը
Տարածաշրջանի երկրները, Բաղայիի խոսքով, եկել են եզրահանգման, որ այդ ձևաչափը պետք է ակտիվ պահել, դրա արդյունավետությունը պետք է բարձրացվի։
«3+3» տարածաշրջանային ձևաչափն անցել է ժամանակի փորձությունը: Այս մասին ճեպազրույցի ժամանակ հայտարարել է Իրանի ԱԳՆ պաշտոնական ներկայացուցիչ Իսմայիլ Բաղային։
Նրա խոսքով՝ Հարավային Կովկասում «3+3» ձևաչափն ունի իր պատմությունը և ստեղծվել է տարածաշրջանի երկրների, այդ թվում՝ Հայաստանի ու Ադրբեջանի և Հարավային Կովկասը շրջապատող պետությունների միջև խորհրդակցությունների համար։
«Մինչ այժմ մի քանի հանդիպումներ են եղել տարբեր երկրներում, և եթե չեմ սխալվում առաջին հանդիպումներից մեկը տեղի է ունեցել Թեհրանում։ Որպես տարածաշրջանային կազմակերպություն, որն աջակցում է Հարավային Կովկասի երկրների, հատկապես Ադրբեջանի Հանրապետության և Հայաստանի Հանրապետության միջև վեճերի լուծմանը, այս մեխանիզմն արդեն անցել է ժամանակի փորձությունը», - նշել է Բաղային։ Նրա խոսքով անկախ Հարավային Կովկասից դուրս զարգացումներից, տարածաշրջանային երկրները եկել են այն եզրակացության, որ այդ ձևաչափը պետք է ակտիվ պահել, ուստի անհրաժեշտ է ջանքեր գործադրել վեճերի լուծման և արտատարածաշրջանային սուբյեկտների միջամտությունը կանխելու նպատակով այս մեխանիզմի արդյունավետությունը բարձրացնելու համար։