ԻԻՀ նախագահը ստորագրել է երկաթուղային տրանսպորտի ոլորտում Թուրքիայի հետ համագործակցության համաձայնագիրը

ԻԻՀ նախագահ Մասուդ Փեզեշքիանը ստորագրել է Իրանի ճանապարհների և քաղաքային զարգացման նախարարության ու Թուրքիայի տրանսպորտի և ենթակառուցվածքների նախարարության միջև համագործակցության համաձայնագիրը, հաղորդում է Mehr-ը։

Իսլամական Հանրապետության Սահմանադրության 123-րդ հոդվածի համաձայն, նախագահ Փեզեշքիանը կիրակի օրը տեղեկացրել է ճանապարհների և քաղաքային զարգացման նախարարությանը օրենքի մասին, որը պետք է ուժի մեջ մտնի, հայտնում է Իրանի նախագահի վարչակազմը։

Համաձայնագիրը հաստատվել էր Իրանի խորհրդարանի բաց նիստում՝ 2025 թվականի փետրվարի 19-ին, և հետագայում վավերացվել  նպատակահարմարության խորհրդի կողմից՝ 2025 թվականի հոկտեմբերի 29-ին՝ հաստատելով դրա համապատասխանությունը ազգի շահերին՝ ըստ Սահմանադրության 112-րդ հոդվածի։

Բացի այդ, համաձայնագրի իրականացումը կախված է վերոնշյալ համաձայնագրի 16-րդ հոդվածում նշված ձևական պահանջների կատարումից, ինչպես նախատեսված է Սահմանադրության 125-րդ հոդվածով։