Իրանը և ԵՄ-ը կարևորում են միջուկային համագործակցությունների զարգացումը
«Ֆարս» գործակալության փոխանցմամբ՝ Բելգիայի մայրաքաղաք Բրյուսելում կայացած «Միջազգային միջուկային համագործակցությունը, ակնկալիքներն ու պարտականությունները» խորագրով սեմինարի ավարտին Իրանը և Եվրամիությունը համատեղ հաղորդագրություն են տարածել: Հաղորդագրությունում նշված է.«Որոշ բնագավառներում Իրան-ԵՄ առկա և զարգացող հարաբերությունները վկայում են համագործակցությունների զարգացմանն ուղղված քաղաքականության արդյունավետության մասին»:
Ըստ տարածած հաղորդագրության՝ միջուկային ոլորտում համագործակցությունը որոշիչ դեր կարող է ունենալ Համատեղ գործողությունների համապարփակ ծրագրի հաջող իրականացման հարցում:
Իրանը և Եվրամիությունը նաև համաձայնության են եկել մինչև 2017 թվականի ավարտը հաջորդ սեմինարը Սպահանում անցկացնելու շուրջ:
Իրանի Իսլամական Հանրապետության նախագահի տեղակալ Ալի Աքբար Սալեհիի, ինչպես նաև կլիմայական փոփոխությունների և էներգետիկայի հարցերով հանձնակատար Միգուել Արիաս Կանյետենի նախաձեռնությամբ Թեհրանը և Բրյուսելը կազմակերպել են «Միջազգային միջուկային համագործակցությունը, ակնկալիքներն ու պարտականությունները» խորագրով սեմինար, որն իր աշխատանքը մեկնարկել է փետրվարի 28-ին և ավարտել՝ մարտի 1-ին:
