Իրանը և Իտալիան կարևորել են տարածաշրջանային ճգնաժամերի կարգավորման անհրաժեշտությունը
Իրանի Իսլամական Հանրապետության և Իտալիայի Արտաքին գործերի նախարարների տեղակալներն ընդգծել են տարածաշրջանային ճգնաժամերը քաղաքական ճանապարհով կարգավորելու անհրաժեշտությունը:
Այսօր Թեհրանում Իտալիայի ԱԳ նախարարի տեղակալ Վինչենզո Ամենդոլայի հետ հանդիպման ժամանակ, անդրադառնալով Միջինարևելյան տարածաշրջանում առկա ճգնաժամերին, Իրանի ԱԳ նախարարի Եվրոպայի և Ամերիկայի հարցերով տեղակալ Մաջիդ Թախթ Ռավանչին ասել է.«Թեհրանը պատրաստակամ է տարածաշրջանի խնդիրների կարգավորման հարցում համագործակցել Հռոմի հետ»:
Նշելով, որ Հռոմը Թեհրանի առևտրային ու տնտեսական կարևոր գործընկերներից է, Թախթ Ռավանչին ասել է.«Երկու երկրներիի հարաբերությունների հեռանկարը շատ հաջող ու լուսավոր է»:
Իտալիայի ԱԳ նախարարի տեղակալն ասել է.«Տարածաշրջանային ճգնաժամերը ռազմական լուծում չունեն և Իտալիան կօգտագործի իր հնարավորությունները տարածաշրջանային հարցերը քաղաքական ճանապարհով լուծելու համար»:
Նշելով, որ Հռոմը պաշտպանում է «5+1» խմբի հետ Իրանի միջուկային համաձայնությունը, Ամենդոլան ասել է.«Իտալիան իր ամբողջ ջանքերը գործի կդնի միջուկային համաձայնության կատարյալ իրագործման ուղղությամբ»:
