Զարիֆ. Տարածաշրջանի երկրները պետք է երկխոսությամբ կարգավորեն իրենց տարաձայնությունները
ԻԻՀ ԱԳ նախարարը տարածաշրջանի երկրներին կոչ է արել երկխոսությամբ կարգավորել տարաձայնությունները:
«Ֆարս» լրատվական գործակալության հաղորդման համաձայն, Մոհամմեդ Ջավադ Զարիֆը երեքշաբթի գիշեր Կատարի «Ալ-Ջազիրա» հեռուստակայանի ինտերնետային կայքում հրապարակված հոդվածում ընդգծելով տարածաշրջանի երկրների ընդհանրությունները նրանց հակադրության փոխարեն միասնականության կոչ է արել: Նա ընդգծել է. «ԻԻՀ-ն անկեղծորեն իր ձեռքը մեկնում է բոլոր հարևաններին»:
Ընդգծելով, որ ԻԻՀ-ն պատերազմ սկսելու նպատակ չունի, Զարիֆը տարածաշրջանի երկրներին կոչ է արել իրենց տարաձայնությունները պատերազմի դաշտի փոխարեն բանակցության սեղանին կարգավորել:
«Իրանի և նրա հետ ցամաքային ու ծովային սահմաններ ունեցող արաբ հարևանների համատեղ անվտանգության հիմքում ընկած են ՄԱԿ-ի փաստաթղթերով ամրագրված ընդհանուր սկզբունքներ, այդ թվում՝ ինքնիշխանությունը, բռնի ուժ կիրառելուց խուսափելը, ճգնաժամերի խաղաղ կարգավորումը, տարածքային ամբողջականության հարգումը, այլ երկրների ներքին հարցերին չմիջամտելն ու ինքնորոշման իրավունքը»,-հավելել է ԻԻՀ ԱԳ նախարարը:
Մոհամմեդ Ջավադ Զարիֆը նաև անդրադարձել է տարածաշրջանում արևմտյան երկրների միջամտություններին ու ռազմական ներկայությանը և ընդգծել է. «Արտասահմանյան երկրները այլընտրանքների միջից մշտապես պատերազմն են ընտրել և տարածաշրջանում իրարահաջորդ պատերազմներ հրահրելով, խաղաղության երևան գալու ու ամրագրվելու համար, որևէ հնարավորություն չեն թողել»:
ԻԻՀ ԱԳ նախարարն ընդգծել է, որ եթե տարածաշրջանի երկրները խաղաղության ուղին չընտրեն, հաջորդ սերունդները միմյանց աչքերի մեջ նայելու առիթը կկորցնեն:
