Իրանն ու ԵԱՏՄ-ն ստորագրել են արտոնյալ առևտրային համաձայնագիր
Աստանայում Իրանի Իսլամական Հանրապետության արդյունաբերության, հանքերի ու առևտրի նախարար Մոհամմեդ Շարիաթմադարիի ներկայությամբ Իրանի և Եվրասիական տնտեսական միության միջև ստորագրվել է արտոնյալ առևտրային համաձայնագիր: Այս մասին հաղորդում է ԻՌՆԱ լրատվական գործակալությունը:
Եվրասիական տնտեսական միության հանձնաժողովի կոլեգիայի նախագահ Տիգրան Սարգսյանն ասել է. «Վերջնական համաձայնագրում մեծ քանակությամբ ապրանքի համար ներմուծման մաքսատուրքերի նվազեցում կամ զրոյականացում է նախատեսվում: Համաձայնագիրը կնպաստի առևտրի ծավալների ավելացմանը: Արտոնյալ սակագներով Իրանից ԵԱՏՄ երկրներ կարտահանվեն միրգ, բանջարեղեն, շինանյութեր, գորգեր և այլն»։
Սարգսյանը հավելել է. «Ըստ համաձայնագրի, միջին հաշվով Իրանը 7 տոկոսով կնվազեցնի արդյունաբերական արտադրանք ներկրելու մաքսատուրքերը:Իրանում գյուղատնտեսական ապրանքների ներկրման տուրքերը կնվազեցվեն մինչև 19 տոկոսով»:
Իրանի արդյունաբերության, հանքերի ու առևտրի նախարար Մոհամմեդ Շարիաթմադարին «Իրան-ԵԱՏՄ հեռանկարը» թեմայով նիստին և Աստանայի միջազգային տնտեսական համաժողովին մասնակցելու նպատակով ժամանել է Ղազախստանի մայրաքաղաք Աստանա:
Համաժողովի շրջանակներում ԵԱՏՄ-ի փոխվարչապետները և Իրանի արդյունաբերության, հանքերի ու առևտրի նախարար Մոհամմեդ Շարիաթմադարին ստորագրել են Իրան-ԵԱՏՄ արտոնյալ առևտրային համաձայնագիրը:
