Ադրբեջանը շարունակում է Թուրքիայի տարածքով նավթ արտահանել Իսրայել
Հղում անելով իսրայելցի պաշտոնյաներին, եբրայալեզու Globes կայքը գրել է, որ չնայած Թուրքիան հայտարարել է Իսրայելի հետ տնտեսական հարաբերությունները դադարեցնելու մասին, իսրայելական տանկերները շարունակում են ադրբեջանական նավթը բեռնել Թուրքիայի Ջեյհան նավահանգստում:
Կայքը գրում է, որ Իսրայելն օրական ներմուծում է 340 հազար բարել նավթ, որից 60%-ը տեղափոխվում է Ղազախստանից և Ադրբեջանից՝ Բաքու-Թբիլիսի-Ջեյհան խողովակաշարով։
Նշվում է, որ Ջեյհան նավահանգստում բեռնվող նավթատարներն ադրբեջանական նավթը տեղափոխում են Հայֆա նավահանգիստ։
Ըստ այս հոդվածի՝ Իսրայելն Ադրբեջանի նավթի արտահանման առաջին ուղղությունն է, իսկ պատճառը, որ Թուրքիան շարունակում է հանդիսանալ միջնորդ երկիր, ոչ միայն Անկարայի, այլ նաև Բաքվի շահերն են։ Իսկ Թուրքիան չի անի որևէ քայլ, որը կվնասի Ադրբեջանի շահերին։