Մամուլի տեսություն 2020-12-14
Լեռնային Ղարաբաղում նոր հրադադարի ռեժիմի առաջին լուրջ խախտումը և Բաքվի ու Երևանի կողմից միմյանց հասցեին հնչեցրած մեղադրանքներն արտացոլվել են իրանական մամուլում:
Քեյհան օրաթերթ
Ո՞վ է նռնակը դրել Էրդողանի թևի տակ
Ի՞նչ է անում Ռեջեփ Թայիփ Էրդողանը տարածաշրջանում: Ակտի՞վ է, թե՝ պասիվ: Նա ծառայո՞ւմ է ժողովրդներին կամ նրանց թշնամիներին: Նա ճանաչո՞ւմ է ընկեր կամ թշնամի, թե ոչ: Նա մտածո՞ւմ է ռացիոնալ թեընկնում է զառանցանքների մեջ և վտանգավոր վարք է դրսևորում: Այս հարցերն ավելի լուրջ են արծարծվել Բաքվում նրա խեղաթյուրված արտահայտություններից հետո: Առաջին և Երկրորդ համաշխարհային պատերազմներից հետո արևմտյան Ասիայի տարածաշրջան ներխուժեցին «քրիստոնեական սիոնիստական» ուժերը, ուստի ի՞նչ կապ ունեն Էրդողանի վերջին դիրքորոշումները «քրիստոնեական սիոնիստական» (Բրիտանիա, ԱՄՆ և Իսրայել) ծրագրի հետ: Սիոնիստական քրիստոնեական դաշինքը Աֆղանստան, Իրաք, Լիբանան և Գազա արշավանքները անվանեց «4-րդ համաշխարհային պատերազմ», իսկ պատերազմի բռնկումը Սիրիայում և Իրաքում «3-րդ համաշխարհային պատերազմ»:
Մառդոմսալառի օրաթերթ
Կրակի փոխանակում Լեռնային Ղարաբաղում
Լեռնային Ղարաբաղում նոր հրադադարի առաջին լուրջ խախտմամբ և ռազմական գործողությունների վերսկսման մեջ բախվող կողմեր միջև կողմերի մեղադրանքով, մտահոգություններ են առաջացել այս շրջանում Հայաստանի և Ադրբեջանի հակամարտության շարունակման վերաբերյալ:
ԻՌՆԱ-ի հաղորդմամբ, Հայաստանը և Ադրբեջանը երեկ միմյանց մեղադրել են Լեռնային Ղարաբաղում հրադադարի ռեժիմը խախտելու մեջ, ինչը արդեն հույսեր էր հարուցել Ռուսաստանի միջնորդությամբ Երևան-Բաքու լարվածությունը դադարեցնելու և Լեռնային Ղարաբաղում կայուն համաձայնության գալու համար:
Շարղ օրաթերթ
Վաշինգտոնը ճգնաժամի մեջ է
Այն բանից հետո, երբ Միացյալ Նահանգների Գերագույն դատարանը մերժեց Տեխաս և 17 այլ նահանգների ներկայացրած բողոքը Ջորջիա, Վիսկոնսին, Փենսիլվանիա և Միչիգան նահանգներում տեղի ունեցած ընտրախախտումների վերաբերյալ, Վաշինգտոնում տեղի է ունեցել նախագահ Դոնալդ Թրամփի կողմնակիցների և ընդդիմադիր խմբերի միջև առաջին փողոցային բախումը: ԱՄՆ-ում բախումները կարող են ավելի մեծ բռնություն առաջացնել Դոնալդ Թրամփի կողմնակիցների և հակառակորդների միջև:
Խոչասան օրաթերթ
Մերձավոր Արևելքը շարժվո՞ւմ է դեպի նոր համակարգ
Վերջին տարիներին Մերձավոր Արևելքում տեղի են ունեցել զարգացումներ, որոնք հարց են առաջացրել արդյոք աշխարհի այս կարևոր հատվածը փոխվո՞ւմ է` նոր համակարգի հասնելու համար:
ԱՄՆ ուշադրությունը կենտրոնացել է Հեռավոր Արևելքի, հատկապես Չինաստանի վրա և տարածաշրջանում իր ուժերի կրճատումը, Լիբիայի, Եմենի, Սիրիայի պատերազմները, Լիբանանում և Իրաքում շարունակվող անկայունությունը, Սաուդյան Արաբիայի թագաժառանգ Բեն Սալմանի արկածները, Էրդողանի երազանքը վերականգնելու Օսմանյան կայսրությունը ԱՄԷ-ի նման փոքր երկրների ակտիվացումը ուժի խաղի ասպարեզում, ցույց է տալիս այս փոփոխությունների բոլոր բնութագրերը:
Թրամփը հայտնել է, թե վետո կդնի Թուրքիայի դեմ պատժամիջոցներ սահմանող օրինագծի վրա
ԱՄՆ Կոնգրեսի Ներկայացուցիչների պալատն ու Սենատը հավանություն էին տվել Թուրքիայի դեմ պարտադիր պատժամիջոցներ կիրառելու նախաձեռնությանը՝ ռուսական S-400 զենիթահրթիռային ՀՕՊ համակարգերի գնման կապակցությամբ: Այս նախաձեռնությունը երկրի պաշտպանական բյուջեի օրինագծի մի մասն է, որը նախատեսված է 2021 ֆինանսական տարվա համար (սկսվել է հոկտեմբերի 1-ին): ԱՄՆ նախագահ Դոնալդ Թրամփը անդրադառնալով թեմային, հայտնել է, որ վետո է կիրառելու այդ օրինագծի դեմ։ Թրամփը Twitter-ում կատարած գրառման մեջ, մասնավորապես նշել է․ «Պաշտպանական նոր օրինագծից ամենաշատ օգտվողը Չինաստանն է։ Օրինագծի դեմ վետո եմ կիրառելու»։ Նշենք, որ եթե Թրամփը վետո դնի, ապա Սենատը կրկին նիստ կգումարի և քվեարկության կդնի օրինագիծը։ Հաստատվելու դեպքում պատժամիջոցներն ուժի մեջ կմտնեն։
orakarg.com
ԱՄՀ-ն Հայաստանին կհատկացնի շուրջ 36.7 մլն դոլարի բյուջետային վարկ |
Դեկտեմբերի 11-ին Արժույթի միջազգային հիմնադրամի Գործադիր խորհուրդը հաստատել է Հայաստանի հետ համատեղ եռամյա ծրագրի գնահատման երրորդ փուլի արդյունքները, ինչի արդյունքում Հայաստանի Հանրապետության համար հասանելի են դարձել 25․714 միլիոն ՀՓԻ (շուրջ 36․7 մլն ԱՄՆ դոլար) ծավալով բյուջետային միջոցներ։ Համատեղ ծրագրի ներքո հատկացվել են 231․657 մլն ՀՓԻ (շուրջ 315 մլն ԱՄՆ դոլար) ընդհանուր ծավալով վարկային միջոցներ։
ԱՄՀ գնահատմամբ դրամավարկային քաղաքականությունը եղել է ըստ անհրաժեշտության ընդլայնողական՝ աջակցելով տնտեսությանը և պահպանելով բանկային համակարգի իրացվելիությունը, իսկ գնաճը պահպանվել է ցածր մակարդակում։ Այնուամենայնիվ, ՀՀ կենտրոնական բանկը պետք է ուշադիր հետևի շուկաների զարգացումներին և պատրաստ լինի անհրաժեշտության դեպքում ճշգրտել դրամավարկային քաղաքականությունը մակրոտնտեսական կայունությունը ապահովելու համար՝ պահպանելով փոխարժեքի ճկունությունը գնաճի նպատակադրման շրջանակներում ցնցումները կլանելու համար։ Չնայած ֆինանսական համակարգը սթրեսի նշաններ ցույց չի տվել, Կենտրոնական բանկը պետք է շարունակի բացահայտել ֆինանսական համակարգում առկա պոտենցիալ խոցելիություններն ու ռիսկերը և պատրաստ լինի ձեռնարկել համապատասխան գործողություններ՝ ֆինանսական կայունությունը ապահովելու համար:
ԱՄՀ խորհրդի անդամները դրական են արձագանքել այն հանգամանքին, որ սոցիալ-տնտեսական ցնցումները նշանակալի բացասական ազդեցություն չեն թողել ֆինանսական համակարգի վրա։ Վերջիններիս դիտարկմամբ՝ ֆինանսական ոլորտի բարեփոխումները, որոնց մի մասը դեռևս ընթացքի մեջ են, կնպաստեն տնտեսական վերականգնմանը և երկարաժամկետ աճին:
168.am
Ադրբեջանին նվիրած հանքերը. Anglo Asian Mining ընդդեմ Հայաստանի
2020 թվականի հոկտեմբերի 22-ին Ադրբեջանի բնապահպանության և բնական պաշարների նախարարությունը տարածեց մի հայտարարություն, որում ասվում էր, որ Ադրբեջանի զինված ուժերը ազատագրել են Զանգելանի շրջանը, որտեղ գտնվում է Վեջնալի (Vejnaly) հանքավայրը, ինչպես նաև հաստատում էր Anglo Asian Mining plc-ի շահագործման իրավունքները այդ և Արցախ տարածքում գտնվող այլ հանքերի վերաբերյալ։ Սական, ինչպես միշտ, Հայաստանի կառավարությունը որևէ ձևով չարձագանքեց Ադրբեջանի այս հայտարարությանը։
Հատկանշական է նաև, որ Anglo Asian Mining-ն Լոնդոնի ֆոնդային բորսայում ցուցակավորված ընկերություն է, և վերոնշյալ երեք հանքերի (Vejnaly, Soutely և Gyzilbulakh) վերաբերյալ տեղեկությունները եղել են հրապարակային, որոնց վերաբերյալ ընկերությունը ներկայացրել է պարտադիր հաշվետվություններ թե իր ներդրողներին և այն երկրի կառավարությանը (Ադրբեջան), որտեղ ընկերությունը գործում է։ Առկա է նաև տեղեկություն առ այն, որ Anglo Asian Mining-ի վերջնական շահառու է հանդիսանում նաև Ալիևների ընտանիքը։
araratnews.am
ԱՄՆ-ը պատրաստվում է կորոնավիրուսի դեմ զանգվածային պատվաստումների
ԱՄՆ-ում զանգվածային օգտագործման համար COVID-19 պատվաստանյութ տեղափոխող առաջին բեռնատարները պատրաստվում են կիրակի դուրս գալ Միչիգանի արտադրական գործարանից: Կորոնավիրուսի բռնկման կասեցումն անհապաղ ջանքեր է պահանջում:
Հաջորդ երեք օրվա ընթացքում ԱՄՆ հիվանդանոցներն ու բաշխիչ կենտրոնները կստանան կորոնավիրուսի մոտ երեք միլիոն դեղաչափ պատվաստանյութեր, որոնք մշակել են ամերիկյան Pfizer և գերմանական BioNTech ընկերությունները: Ընդհանուր առմամբ, մինչև դեկտեմբերի վերջ 20 միլիոն մարդ կկարողանա պատվաստվել: Առաջնահերթությունը տրվելու է բուժաշխատողներին ու ծերանոցի բնակիչներին:
«Թշնամին կպարտվի»,- ասել է լոգիստիկ գործողության ղեկավար Գուս Պերնան,- «Մենք ակնկալում ենք, որ մոտ երեք շաբաթ անց կկարողանանք պատվաստանյութը հասցնել նահանգների կողմից նշված բոլոր հաստատություններին»:
Դեղերի արտադրության համար ԱՄՆ-ում ընտրվել է երեք գործարան՝ Կալամազում, Սենթ Լուիսում և Անդովերում: Պատվաստանյութը պետք է անընդմեջ պահպանվի -70 աստիճանի պայմաններում:
Ռուսաստանի ՊՆ–ն թարմացրել է ռուս խաղաղապահների պատասխանատվության գոտու քարտեզն Լեռնային Ղարաբաղում
Ռուսաստանի ՊՆ-ն հրապարակել է դեկտեմբերի 13-ի դրությամբ Արցախում իրավիճակի մասին հերթական քարտեզը:
Ի տարբերություն նախորդ նմանատիպ քարտեզների՝ նոր քարտեզում որպես ռուս խաղաղապաների պատասխանատվության գոտի ավելացել է նաև Խծաբերդ-Հին Թաղեր հատվածը, թեև այստեղ խաղաղապահների դիտարկման կետի առկայության մասին նշում չկա:
Ավելի վաղ հայտնել էինք, որ դեկտեմբերի 11-ին, օգտվելով այն փաստից, որ Արցախի Հանրապետության տվյալ հատվածում խաղաղապահ ուժեր տեղակայված չեն, Ադրբեջանի զինված ուժերի հատուկջոկատային ստորաբաժանումները գրոհ են ձեռնարկել արցախա-ադրբեջանական շփման գծի՝ Հադրութի շրջանի Հին Թաղեր և Խծաբերդ բնակավայրերի հատվածում, ինչի հետևանքով տարբեր աստիճանների հրազենային վիրավորումներ են ստացել ՊԲ վեց զինծառայողներ:
ՊՆ հաղորդագրության համաձայն, մի քանի ժամ տևած մարտերի արդյունքում հակառակորդին հաջողվել է մտնել Հին Թաղեր գյուղ, ինչպես նաև ընդհուպ մոտենալ Խծաբերդ գյուղին։
ՀՀ ԱԳՆ–ը հայտնել է, որ Ադրբեջանական ուժերը սադրիչ գործողությունները շարունակվել են նաև այսօր՝ Շուշիի շրջանի Մեծ Շեն և Հին Շեն բնակավայրերի ուղղությամբ:
