Մեկնաբանություն-ԻԻՀ գերագույն առաջնորդն ընդգծել է Սիրիայի տարածքային ամբողջականության պահպանման անհրաժեշտությունը

Իրանի Իսլամական հեղափոխության գերագույն առաջնորդն ընդգծել է Սիրիայի տարածքային ամբողջականության պահպանման անհրաժեշտությունը: «Սիրիայի հյուսիսում ցանկացած ռազմական գործողություն անշուշտ կվնասի Թուրքիային, Սիրիային և ողջ տարածաշրջանին և օգուտ կբերի ահաբեկիչներին»,- ասել է նա։

Իսլամական հեղափոխության գերագույն առաջնորդ Այաթոլլահ Խամենեին այսօր  Թուրքիայի նախագահ Ռեջեփ Թայիփ Էրդողանի և նրան ուղեկցող պատվիրակության հետ հանդիպման ժամանակ, ընդգծելով, որ Իրանը Թուրքիայի և նրա սահմանների անվտանգությունն իր սեփական անվտանգությունն է համարում ասել է. «Դուք ևս պետք է  Սիրիայի անվտանգությունը ձեր անվտանգությունը համարեք։ Սիրիական հարցերը պետք է լուծվեն բանակցությունների միջոցով, իսկ Իրանը, Թուրքիան, Սիրիան եւ Ռուսաստանը պետք է  այս հարցը լուծեն երկխոսության միջոցով»։

Թուրքիայի նախագահը  հայտարարել է, որ Անկարայի դիրքորոշումը Սիրիայի տարածքային ամբողջականության հարցում հստակ է: «Մենք ակնկալում ենք, որ Սիրիայի իշխանությունը քաղաքական գործընթացներ կսկսի։ Աստանայի գագաթնաժողովում սիրիական հարցը օրակարգում է, և մենք հույս ունենք լավ արդյունքների հասնել»,-ասել է նա։

Նշենք, որ Թուրքիայի նախագահ Ռեջեփ Թայիփ Էրդողանը և ՌԴ նախագահ Վլադիմիր Պուտինը  ժամանել են Թեհրան՝ հանդիպելու Իրանի Իսլամական Հանրապետության պաշտոնյաների, այդ թվում՝ Իսլամական հեղափոխության գերագույն առաջնորդի և Իրանի Հանրապետության նախագահ Սեյեդ Էբրահիմ Ռայիսիի հետ և քննարկելու սիրիական հակամարտությունը:

Այսօր երեկոյան, Թեհրանում Իրանի, Ռուսաստանի և Թուրքիայի նախագահների մասնակցությամբ, կանցկացվի Աստանայի գործընթացի երաշխավոր երկրների 7-րդ գագաթնաժողովը։

Վերջին տարիներին Իրանը, Ռուսաստանը և Թուրքիան  «Աստանայի խաղաղության գործընթացի» շրջանակում ջանում են  վերջ դնել Սիրիայի ավելի քան 11 տարվա հակամարտություններին:

Այն դեպքում, երբ Իրանն ու Ռուսաստանը աջակցում են Բաշար Ասադի օրինական կառավարությանը, Թուրքիան աջակցում է Դամասկոսի կառավարության ընդդիմադիրներին։

Թուրքիայի նախագահ Ռեջեփ Թայիփ Էրդողանն ավելի վաղ հայտարարել է Սիրիայի հյուսիսում նոր ռազմական գործողություն սկսելու մասին։

«Սկսվում է Սիրիայում՝ Թուրքիայի սահմանից 30 կմ խորությամբ «անվտանգության գոտու» ձևավորման նոր փուլը։ Մենք մաքրում ենք ահաբեկիչներից Թալ-Ռըֆաթն ու Մյունբիչը»,-ասել է նա:

Ահաբեկչության դեմ պայքարի պատրվակով Սիրիայի հյուսիսում Թուրքիայի հարձակումները տարածաշրջանի վիճելի հարցերից են։ Իրանն ընդգծում է սիրիական խնդիրները քաղաքական ճանապարհով լուծելու անհրաժեշտությունը և քաղաքական լուծումը համարում է Թուրքիայի անվտանգության մտահոգությունները նվազեցնելու միակ ելքը։

Նույն շրջանակներում, վերջին շաբաթների ընթացքում Իրանի դիվանագիտական գերատեսչությունն օրակարգ էր մտցրել Սիրիայի և Թուրքիայի իշխանությունների հետ խորհրդակցությունները:  Իրանի արտգործնախարար Հոսեյն ԱմիրԱբդոլլահյանն այցելել է Թուրքիա  և Սիրիա և բանակցություններ վարել այս երկու երկրների պաշտոնյաների հետ՝ տարածաշրջանում ցանկացած լարվածություն կանխելու նպատակով քաղաքական լուծում գտնելու համար:

Իրանի Իսլամական Հանրապետության տեսանկյունից կարևոր է պահպանել Սիրիայի անվտանգությունն ու կայունությունը և այդ երկրի հեղինակավոր ներկայությունը տարածաշրջանային հավասարումներում: Իսկ Թեհրանում Աստանայի գործընթացի երաշխավոր երկրների 7-րդ գագաթնաժողովի անցկացումը նույնպես կարելի է գնահատել որպես սիրիական հակամարտության հետ կապված առկա տարաձայնությունների լուծման ուղղությամբ Իրանի դիվանագիտական ​​ջանքերի շարունակություն։

Իսլամական հեղափոխության գերագույն առաջնորդը Թուրքիայի նախագահի հետ հանդիպման ժամանակ նշելով, որ չպետք է ապավինել ԱՄՆ-ին ու Սիոնիստական ռեժիմին, ասել է.«Այսօր ո՛չ Սիոնիստական ​​ռեժիմը, ո՛չ ԱՄՆ-ն, ոչ էլ մյուսները չեն կարող կասեցնել պաղեստինցիների խորքային շարժումը, և վերջում ամեն ինչ Պաղեստինի  ժողովրդի օգտին կլինի»:

Հեղափոխության գերագույն առաջնորդը մշտապես ընդգծել է, որ  Սիոնիստական ​​ռեժիմի հետ ցանկացած հարաբերության հաստատումը սխալ է, քանի որ այդ ռեժիմը հանդիսանում է տարածաշրջանի և իսլամական աշխարհի խնդիրների  հիմնական պատճառը: Նա  տարածաշրջանի կառավարություններին հիշեցրել է, որ ծավալապաշտանական նպատակներ հետապնդող սիոնիստների հետ հարաբերությունների կարգավորումը  երբեք չի նվազեցնելու նրանց հանցագործությունները պաղեստինցիների և իսլամական սրբավայրերի դեմ:

Հետևաբար, կասկած չկա, որ օկուպացիայի և հատկապես Պաղեստինի ժողովրդի դեմ անմարդկային գործողությունների երկար պատմություն ունեցող Սիոնիստական ​​ռեժիմը,  երբեք չի ձգտել այնպիսի խաղաղ հարաբերությունների, որոնք կներառեն այս տարածաշրջանի մուսուլման ժողովուրդների շահերը: Արաբական և իսլամական երկրների հետ  հարաբերությունները կարգավորելով Սիոնիստական ռեժիմը նպատակ ունի դուրս գալ մեկուսացումից, թուլացնել իսլամական հասարակությունները, ինչպես նաև շարունակել  օկուպացիան և իր ծավալապաշտական նկրտումները:

Նշելով, որ  իսլամական ումմայի վեհությունն ու արժանապատվությունը պայմանավորված են ճաշակի տարբերությունների հաղթահարմամբ և պառակտիչ քաղաքականության դիմաց զգոնությամբ, մեծարգո առաջնորդն ասել է.«Տարածաշրջանում տարաձայնությունների ու թշնամանքի պատճառներից մեկը  Սիոնիստական օկուպանտ ռեժիմն է, որին աջակցում է  ԱՄՆ-ը»: