Մամուլի տեսություն - 19.06.2023
Ուկրաինայի իշխանությունները չգիտեն, որ իրենց երկրի տարածքը դարձրել են միջազգային համակարգում ամերիկյան խաղի թատերաբեմ։ Ուկրաինայի պատերազմը դեռևս պատրվակ է ԱՄՆ-ի և ՆԱՏՕ-ի համար՝ ընդլայնելու իրենց ռազմական ներկայությունը Արևելյան Եվրոպայում և միջուկային զենք պահպանելու եվրոպական երկրներում։
Վաթանե Էմրուզ օրաթերթ
ՆԱՏՕ-ի և Պուտինի միջուկային սպառնալիքը
Ուկրաինայի հարավում հակամարտությունների աճին զուգահեռ, արևմտյան երկրներն ակտիվացրել են Ուկրաինա զենք ուղարկելու քանակը։ ՌԴ նախագահ Վլադիմիր Պուտինը ամիսներ շարունակ զգուշացնում է ՆԱՏՕ-ի անդամ երկրների կողմից Ուկրաինայի հետագա զինման մասին, սակայն Ուկրաինա ուղարկվող զենքի հոսքը ոչ միայն չի նվազել, այլև արևմտյան երկրներն ավելի շատ ծանր սպառազինություն են ուղարկել Ուկրաինա, այդ թվում՝ առաջատար տանկեր։ Եւ այժմ բանակցություններ են վարում F-16 կործանիչներ ուղարկելու ուղությամբ։
Ուկրաինա զենք ուղարկելու ԱՄՆ-ի և ՆԱՏՕ-ի նպատակը պատերազմը քայքայելն է և Ռուսաստանի ռազմական և տնտեսական ուժերը թուլացնելը։ Փաստորեն, Վաշինգտոնը ուկրաինացի ժողովրդին դարձրեց Արևելյան Եվրոպայում Ռուսաստանին զսպելու իր քաղաքականության զոհը: Խնդիր, որի մասին շատ վերլուծաբաններ զգուշացնում էին 2014 թվականից, սակայն Կիևի ծայրահեղական իշխանությունները դրան ուշադրություն չդարձրին և Ուկրաինայի տարածքը դարձրին միջազգային համակարգում ամերիկյան խաղի թատերաբեմ։ Ուկրաինայի պատերազմը նաև պատրվակ է դարձել Ամերիկայի և ՆԱՏՕ-ի համար՝ ընդլայնելու իրենց ռազմական ներկայությունը Արևելյան Եվրոպայում, միջուկային զենք պահպանելու եվրոպական երկրներում, ներառյալ Գերմանիայում, և ֆիզիկապես ընդլայնելու ՆԱՏՕ-ն՝ միացնելով կազմակերպությանը Ռուսաստանին մոտ գտնվող երկրներով:
Իրան օրաթերթ
Սպիտակ տան հիասթափությունը Ռիադի և Թել Ավիվի միջև հարաբերությունների կարգավորման նախագծից
New York Times-ը իր զեկույցում, խոստովանելով, որ ԱՄՆ կառավարությունը կասկածում է, որ Սաուդյան Արաբիայի և Սիոնիստական ռեժիմի հարաբերությունների կարգավորման նախագիծը կհասնի Վաշինգտոնի և Թել Ավիվի ցանկալի արդյունքին, հայտարարեց, որ Սպիտակ տունը դեռ հետամուտ է հարաբերությունների կարգավորմանը և աշխատում է դրա օգտին, բայց մնում է պարզել, թե արդյոք Ռիադի այս համաձայնագրի համար դրանք իրագործելի են, թե ոչ:
Քաղաքական դիտորդները կարծում են, որ Սաուդյան Արաբիան պետք է ավելի շատ զիջումների գնա Թել Ավիվի հետ հարաբերությունները կարգավորելու համար, և նախքան Սիոնիստական ռեժիմի հետ որևէ համաձայնագիր ստորագրելը պետք է հրաժարվի Պաղեստին պետության ստեղծման իր հին դիրքորոշումից։ Մյուս կողմից, եթե Նեթանյահուն ընդունի Սաուդյան Արաբիայի միջնորդությունը Միացյալ Նահանգների կողմից, նա կբախվի իր բարձրաստիճան զինվորականների կոշտ քննադատությանը, թեև Սաուդյան Արաբիայի հետ ցանկացած խաղաղ համաձայնագրի կնքումը Նեթանյահուի համար կարևոր ձեռքբերում կլինի՝ հաշվի առնելով ներքին ճգնաժամը։
Քեյհան օրաթերթ
Փողոցային պատերազմ Ֆրանսիայում՝ ոստիկանության և բնապահպան ակտիվիստների միջև - Վիրավորվել է 62 մարդ, այդ թվում՝ 12 ոստիկան
Ֆրանսիայում «Լիոն-Թուրին» արագընթաց երկաթուղու կառուցման դեմ բողոքի ցույցը վերածվել է փողոցային պատերազմի ոստիկանության և բնապահպան ակտիվիստների միջև, և այդ բախումների ընթացքում տուժել է առնվազն 62 մարդ, այդ թվում՝ 12 ոստիկան։
Ֆրանսիայում բնապահպան ակտիվիստները բողոքում են այս երկրի և Իտալիայի միջև արագընթաց երկաթուղու կառուցման դեմ։ Ասում են՝ այս երկաթգծի կառուցման նախագծում թունել փորելը վնաս կհասցնի շրջակա միջավայրին։
Սակայն Ֆրանսիայի կառավարությունը վճռական է այս նախագիծն ավարտին հասցնելու հարցում:
tert.am
«Զանգեզուրի միջանցքը» կկտրի հարավի հետ Հայաստանի կապը․ իրանցի փորձագետ
Զգուշացնելով Հայաստանի հարավից Ադրբեջանի և Նախիջևանի միջև Զանգեզուրի միջանցքի ստեղծման մասին, Կովկասի հարցերով փորձագետ, SCAP տրանսպորտային կոմիտեում Իրանի նախկին ներկայացուցիչը Մոհամմադ Իսմայիլ Ալիխանին ասել է.
«Եթե Հայաստանը հարավում, ԻԻՀ հետ սահմանին Ադրբեջանին տարածք տրամադրի, կդադարի լինել Իրանի հարևանը»:
Հայտնում է Parstoday-ը։
Նա հավելել է, որ Իրանն ունի Հայաստանի հետ ամենակարճ ընդհանուր սահմանը (38 կմ): Այն Իրանի և Եվրոպայի միջև հաղորդակցության դարպասներից մեկն է և ունի մեծ նշանակություն։
Այս իրավիճակում, եթե ստեղծվի «Զանգեզուրի միջանցքը», Հայաստանը կկորցնի իր կապը հարավի հետ, իսկ Իրան մեկնելու համար հայերը պետք է ունենան Ադրբեջանի համաձայնությունը և թույլտվությունը:
tert.am
Լրիվ նորմալ է, աշխուժություն է․ Երասխի գյուղապետը՝ իրավիճակի մասին
Ադրբեջանական կողմը կարճ կրակահերթեր է արձակել մետալուրգիական գործարանի ուղղությամբ, այս պահին գյուղում իրավիճակը հանգիստ է։
Այս մասին Tert.am-ի հետ զրույցում հայտնեց Երասխի վարչական ղեկավար Սարո Այվազյանը։
«Լրիվ նորմալ է, մարդիկ ապրում են իրենց բնականոն կյանքով, աշխատում են այգիներում, աշխուժություն է, ոչ մի խնդիր չկա»,- փոխանցեց համայնքի ղեկավարը։
Նրա խոսքով՝ արդեն մի քանի օր է՝ մետալուրգիական գործարանի տարածքում շինարարական աշխատանքներ չեն կատարվում։ Գործարանի վերաբերյալ այլ հարցերի համայնքի ղեկավարը չցանկացավ պատասխանել՝ հորդորելով դիմել ընկերության ղեկավարությանը։
Հիշեցնենք` ադրբեջանական ստորաբաժանումները հունիսի 13-ից պարբերաբար կրակում են Երասխի հատվածում տեղակայված հայկական դիրքերի ուղղությամբ։ Ադրբեջանական կողմը թիրախավորում է նաև Երասխի տարածքում կառուցվող մեղաղալուրգաիական գործրանը, ինչի հետևանքով վիրավորվել է տարածքում աշխատող Հնդկաստանի 2 քաղաքացի։
tert.am
Արարատ Միրզոյանը Մինսկում կմասնակցի ՀԱՊԿ արտգործնախարարների խորհրդի նիստին
Հունիսի 19-20-ը ՀՀ արտաքին գործերի նախարար Արարատ Միրզոյանը կգտնվի Մինսկում՝ մասնակցելու Հավաքական անվտանգության պայմանագրի կազմակերպության (ՀԱՊԿ) արտաքին գործերի նախարարների խորհրդի նիստին։
Այս մասին հայտնում են ԱԳՆ-ից։
armenpress.am
Քննարկվում է Կապանում Ռուսաստանի հյուպատոսություն բացելու հարցը
Քննարկվում է հենց Կապանում Ռուսաստանի Դաշնության գլխավոր հյուպատոսություն բացելու հարցը:
«Արմենպրես»-ի հաղորդմամբ՝ այս մասին ասաց Հայաստանի արտաքին գործերի փոխնախարար Վահան Կոստանյանն ԱԺ-ում լրագրողների հետ ճեպազրույցում:
«Քննարկվում է հենց Կապանում գլխավոր հյուպատոսություն բացելու հարցը»,-ասաց Կոստանյանը:
Թե ինչ նպատակներով է ՌԴ-ն հենց Կապանն ընտրել, փոխնախարարը հորդորեց հարցնել Հայաստանում ՌԴ-ի դեսպանությանը:
«Ընթացակարգերն ամբողջությամբ պահպանվելու են: Մենք ողջունում ենք մեր միջազգային գործընկերների հետաքրքրությունն ու ցանկությունը՝ Սյունիքում ունենալ դիվանագիտական ներկայացուցչություն՝ տեղում իրավիճակին ավելի լավ ծանոթանալու համար»,-ասաց Կոստանյանը:
Ավելի վաղ Կապանում գլխավոր հյուպատոսություն էր բացել Իրանի Իսլամական Հանրապետությունը:
armenpress.am
Արցախի բուժհաստատություններում չեղարկվել են բոլոր ոչ հրատապ հետազոտությունները և վիրահատությունները
Արցախի Հանրապետության բոլոր բուժհաստատություններում հունիսի 19-ից չեղարկվել են բոլոր ոչ հրատապ հետազոտությունները և վիրահատությունները։ «Արմենպրես»-ի փոխանցմամբ՝ այս մասին հաղորդագրություն է տարածել Արցախի առողջապահության նախարարությունը:
«Հունիսի 15-ից արդեն 5-րդ օրն է, ինչ Ադրբեջանի կողմից ամբողջապես արգելափակված է Կարմիր խաչի միջազգային կոմիտեի կողմից արցախցի բուժառուների երկկողմանի տեղաշարժը և բժշկական պարագաների ու դեղորայքի մատակարարումը Արցախ։
Դեղորայքի ներկրման կասեցմամբ պայմանավորված՝ ստացիոնար հատվածում դեղորայքի բավարարվածությունը հասել է շուրջ 40 տոկոսի, իսկ ամբուլատոր հատվածում՝ շուրջ 20 տոկոսի: Հաշվի առնելով ստեղծված իրավիճակը՝ հանրապետության բոլոր բուժհաստատություններում այսօրվանից չեղարկվել են բոլոր ոչ հրատապ հետազոտությունները և միջամտությունները (վիրահատությունները)։
Շուրջ 175 բուժառուներ՝ տարբեր ախտորոշումներով, սպասում են Հայաստանի Հանրապետության բուժհիմնարկներ տեղափոխվելու հնարավորությանը՝ համապատասխան բուժօգնություն ստանալու համար։ Անհապաղ տեղափոխման ենթակա անձինք ունեն ուռուցքային և սիրտ- անոթային համակարգի հիվանդություններ»,- ասված է հաղորդագրության մեջ:
Հաղորդագրության մեջ նաև նշվում է, որ այս պահի դրությամբ Արցախի առողջապահության նախարարության «Արևիկ» բուժմիավորումում 8 երեխա գտնվում է վերակենդանացման և նորածնային բաժանմունքում։
Արցախի «Հանրապետական բժշկական կենտրոն»-ում 8 հիվանդ գտնվում է վերակենդանացման բաժանմունքում, որից 3-ը՝ ծայրահեղ ծանր վիճակում։
armenpress.am
ՀՀ ԱԳ փոխնախարարը ներկայացրեց, թե Հայաստանն ու Ադրբեջանը որ հարցերում համաձայնության չեն գալիս
Հայաստանի արտաքին գործերի փոխնախարար Վահան Կոստանյանը ներկայացրեց, թե խաղաղության բանակցությունների շրջանակում Հայաստանն ու Ադրբեջանը սկզբունքային որ հարցերի շուրջ դեռևս համաձայնության չեն գալիս:
«Արմենպրես»-ի հաղորդմամբ՝ անդրադառնալով հարցին, թե ո՞ր հարցերի շուրջ կոնսենսուս չկա՝ Կոստանյանն ԱԺ-ում լրագրողների հետ ճեպազրույցում պատասխանեց՝ սկզբունքային հարցերի շուրջ:
«Այդ թվում քարտեզի ֆիքսման, թե որ թվականին քարտեզի հիման վրա պետք է տեղի ունենա հետագա սահմանազատման գործընթացը, երաշխավորների ինստիտուտի հետ կապված, ԼՂ ժողովրդի անվտանգության երաշխիքների հետ կապված, Բաքու-Ստեփանակերտ երկխոսության միջազգային մեխանիզմի հետ հետ կապված, ցավոք սրտի, այս պահին դեռևս չկա համաձայնություն, երկու կողմերի տեսակետները բավականին հեռու են միմյանցից»,-ասաց Կոստանյանը:
Փոխնախարարը, սակայն հավելեց, որ աշխատանքները շարունակվում են:
