Մամուլի տեսություն 5․03․2024
«Ծերուկների համար տեղ չկա»։ Սա Ամերիկայում վերջին օրերի և շաբաթների գրեթե բոլոր հարցումների ամփոփումն է Բայդենի և Թրամփի ֆիզիկական և մտավոր որակների մասին՝ Ամերիկայում իշխանությունը կրկին ստանձնելու համար։
Իրան
Ամոթալի ցեղասպանության նոր էտապը
Նեթանյահուն և նրա արմատական կաբինետը այլ նպատակ չունեն, քան Պաղեստինի ոչնչացումը, բայց Պաղեստինը տոկուն է։
Ռաֆահը քաղաք է, որը գտնվում է Եգիպտոսի սահմանին և նրա վրա իսրայելական ռազմական հարձակումների մեկնարկից հետո վերջին շաբաթների ընթացքում այս քաղաքը դարձել է «մեծ բանտ» այնտեղ ապաստան գտած մոտ մեկուկես միլիոն պաղեստինցիների համար։
Միևնույն ժամանակ, երբ Թել Ավիվի մանկասպան կառավարությունը անխնա ռմբակոծում էր Գազայի հատվածը, փախչող պաղեստինցիներին խորհուրդ էր տվել մտնել Ռաֆահ՝ այն համարելով անվտանգ վայր իրենց համար, բայց ինչպես միշտ, կեղծավորությամբ թիրախավորել է նույն մարդկանց ու նույն քաղաքը։
Սա այն դեպքում, երբ միջազգային հանրությունը և դիտարկող կառույցները, այդ թվում՝ ՄԱԿ-ը և Անվտանգության խորհուրդը, բազմիցս զգուշացրել են բռնազավթիչ Սիոնիստական ռեժիմին, որ Ռաֆահում մարդկանց վրա կրակ բացելու հետևանքով արյան գետեր կհոսեն։
Քեյհան
Բայդենի և Թրամփի տկարամտության մասին Associated Press-ի հարցման հետաքրքիր արդյունքները
Ամերիկյան ընտրությունների մասին վերջին հարցման արդյունքները ցույց են տալիս, որ ընտրողների մեծ մասը կարծում է, որ Ջո Բայդենը և Դոնալդ Թրամփը նախագահի պաշտոնը ստանձնելու համար չունեն անհրաժեշտ գիտակցությունը։
Associated Press-ի և NORC հարցումների ինստիտուտի կողմից անցկացված վերջին հարցման արդյունքները հաստատում են այս հանգամանքը։
Associated Press-ը գրել է. Այս հարցումը ցույց է տալիս, որ հարցվածների մոտ 60 տոկոսը այնքան էլ կամ ընդհանրապես չի հավատում, որ 81-ամյա Ջո Բայդենն ունի նախագահի պաշտոնը ստանձնելու համար անհրաժեշտ հիշողությունն ու խելացիությունը։ Հարցման մասնակիցների նույնքան տոկոսը նույնպես կարծում է, որ 77-ամյա Դոնալդ Թրամփը նախագահի պաշտոնը զբաղեցնելու համար չունի անհրաժեշտ գիտակցությունը։
Ջավան
Հրաժարականների շղթան Սիոնիստական ռեժիմի անվտանգության օղակներում
Մինչ Իսրայելի վարչապետը շարունակում է ընդդիմանալ հրադադարի կոչերին, հրաժարական են տվել անվտանգության մի շարք բարձրաստիճան պաշտոնյաներ, այդ թվում՝ Գազայի պատերազմի ժամանակ հայտնի դարձած Իսրայելի բանակի խոսնակ Դանիել Հագարին:
Էթելաաթ
Իրաքի վարչապետն ընդգծել է․ Իրանը մեր կողքին կռվել է ԻԼԻՊ-ի դեմ
Իրաքի վարչապետն իր ելույթում ընդգծել է երկրում ամերիկյան կոալիցիայի ներկայությունը դադարեցնելու անհրաժեշտությունը՝ ասելով. «Իրանն աջակցել է Բաղդադին ԻԼԻՊ-ի դեմ պատերազմում և մեր կողքին կռվել է ահաբեկիչների դեմ»:
«Մուհամեդ Շյաը ալ-Սուդանին հավելել է. «Իրանի Իսլամական Հանրապետությունը մեր հարեւան երկիրն է, որի հետ մենք ունենք բազմաթիվ կրոնական և սոցիալական ընդհանրություններ»:
Համշահրի
ՆԱՏՕ-ի նոր զորավարժությունների անցկացումը 2 նոր անդամների ներկայությամբ
ՆԱՏՕ-ի ռազմական դաշինքի զորավարժությունները մեկնարկում են այսօր երկու նոր անդամների՝ Ֆինլանդիայի և Շվեդիայի մասնակցությամբ և ավելի քան 20000 զինվորականների ներկայությամբ։
Ավելի քան չորս հազար ֆին զինվորներ, որպես ՆԱՏՕ-ի նոր անդամ երկրի զինվորներ, ներկա են այս մեծ զորավարժություններին։
Armenpress.am
Հայ-թուրքական հաշտեցման գործընթացը տևական ժամանակ առաջ չի գնում, և դրա միակ պատասխանատուն թուրքական կողմն է․ Սաֆրաստյան
Հայ-թուրքական բանակցային գործընթացը թուրքական կողմն օգտագործում է ոչ թե խնդիրները լուծելու համար, այլ ձգտում է գործընթացը վերածել դիվանագիտական պայքարի՝ ստանալով առավելություններ, իսկ Հայաստանն էլ, շարունակելով բանակցությունները, պետք է այդ պայքարում փորձի առաջ տանել իր մոտեցումները։
«Արմենպրես»-ի հետ զրույցում այդ կարծիքը հայտնեց ակադեմիկոս, թուրքագետ Ռուբեն Սաֆրաստյանը՝ անդրադառնալով հայ-թուրքական հարաբերությունների հեռանկարին և Անթալիայում կայացած դիվանագիտական ֆորումում ներկայացված մոտեցումներին։
«Հայ-թուրքական հաշտեցման գործընթացն, ըստ էության, տևական ժամանակ է, ինչ առաջ չի գնում, և դրա միակ պատասխանատուն թուրքական կողմն է, որը լոկ խոսքերով հայտարարում է, թե հրաժարվում է նախապայմաններից, բայց իրականում դրանք առաջ է քաշում ավելի կոշտ կերպով։ Նախագահ Էրդողանի անցյալ տարվա հայտարարությունները վկայում են այն մասին, որ արդեն նախապայմանները նա ձևակերպում է որպես պահանջներ։ Անկարան նախկինի պես հայ-թուրքական հաշտեցման գործընթացը կապում է Հայաստանի ու Ադրբեջանի միջև ընթացող բանակցությունների հետ՝ ակնկալելով, որ հայկական կողմը միակողմանիորեն կգնա զիջումների և խաղաղության պայմանագիր կկնքի Ադրբեջանի հետ՝ վերջինիս մաքսիմալիստական պահանջների հիման վրա»,- ասաց Սաֆրաստյանը։
Նրա դիտարկմամբ՝ քանի դեռ նման բան տեղի չի ունեցել, և Հայաստանը չի ենթարկվել Թուրքիայի ու Ադրբեջանի ճնշումներին, թուրքական կողմն, ըստ էության սառեցրել է ՀՀ-ի հետ իր հարաբերությունների կարգավորման գործընթացը։
«Անթալիայում ՀՀ ԱԺ փոխխոսնակ Ռուբեն Ռուբինյանի ելույթը ևս մեկ անգամ վկայեց այն մասին, որ Հայաստանը շարունակում է իր քաղաքականությունը, որը որդեգրել է դեռ առաջին օրվանից և պնդում է, որ Թուրքիայի հետ հարաբերությունների կարգավորումը պետք է տեղի ունենա առանց նախապայմանների։ Այստեղ հետաքրքիր էր թուրքական կողմի բանագնաց Սերդար Քըլըչի արձագանքը։ Նա կիրառեց դիվանագիտական հնարք՝ փորձելով Հայաստանին մեղադրել նախապայմաններ առաջ քաշելու մեջ։ Քըլըչն ակնարկում էր, որ Հայաստանն է առաջարկում բանակցությունները շարունակել երրորդ երկրներում, մինչդեռ Անկարան ցանկանում է, որ հանդիպումները կայանան կամ Թուրքիայում, կամ Հայաստանում։ Ավելին, Քըլըչն առաջարկեց հաջորդ հանդիպումն անցկացնել Երևանում։ Թուրք բանագնացի կողմից կիրառված մյուս հնարքը վերաբերում էր երևանյան հնարավոր հանդիպման արդյունքում կարևոր որոշումներ կայացնելուն»,- նշեց մեր զրուցակիցը։
Panorama.am
«Մենք կանք». Ադրբեջանը հստակ ուղերձ է հղում աշխարհին` արցախցիների վերադարձը սեփական հայրենիք չի դիտարկում
«Մենք կանք» քաղաքացիական նախաձեռնությունը տարածել է հայտարարություն ադրբեջանական վանդալիզմի հերթական դրսևորումների վերաբերյալ, որտեղ ասված է.
«Էթնիկ զտման ճանապարհով արցախյան խնդիրը փակելու Ադրբեջանի հայատյաց քաղաքականությունը շարունակում է ինքնահաստատվել նորանոր դրսևորումներով։ Շարունակելով ոտնձգությունները պատմական հուշարձանների նկատմամբ՝ ադրբեջանական իշխանությունները հիմա էլ պատերազմ են վարում Արցախի պետական խորհրդանիշ հանդիսացող կառույցների հետ։ Հանրահայտ ու համաշխարհային հեղինակությունների՝ Շառլ Ազնավուրի, մարշալ Խուդյակովի և այլոց հուշարձանների հանդեպ վանդալիզմի անպատժելիությունը վերաճել է նոր մակարդակի ավերածությունների։
ԶԼՄ֊ներում ու սոցցանցերում այսօր տարածվող տեսանյութերը` Արցախի խորհրդարանի շենքի ավիրման ու Աստվածամոր Սուրբ Հովանի Մայր Տաճարի պղծման կադրերը հերթական անգամ հաստատում են Ադրբեջանի՝ ահաբեկչական երկրին բնորոշ վարքագիծը։
Հարվածելով Արցախի Հանրապետության ժողովրդավարության խորհրդանիշին՝ Ադրբեջանը հստակ ուղերձ է հղում աշխարհին` արցախցիների վերադարձը սեփական հայրենիք չի դիտարկում։
«Մենք կանք» քաղաքացիական նախաձեռնությունն իր վրդովմունքն է հայտնում բարբարոսության հերթական ակտի հանդեպ և Ադրբեջանի իշխանություններից պահանջում է դադարեցնել մեր հայրենիքի նկատմամբ պղծումների քաղաքականությունը, ինչպես նաև դիմում է`
֊Արցախի ու Հայաստանի հասարակություններին և իշխանություններին` բարձրաձայնել մեր անհատական ու հավաքական իրավունքների պաշտպանության մասին և դատապարտել Ադրբեջանի հայաֆոբ քաղաքականությունը։
- 2020թ. նոյեմբերից Արցախում խաղաղապահ առաքելություն ստանձնած և այսօր արցախցիների վերադարձի հնարավորության մասին բարձրաձայնող Ռուսաստանի Դաշնության իշխանություններին՝ լինել հավատարիմ միջնորդական ջանքերի կանոններին ու առնվազն չթույլատրել վանդալիզմի նմանօրինակ դրսևորումներ։
Aysor.am
Հայ ռազմագերիները խոշտանգվում են Բաքվի բանտերում, գերեվարված է Արցախի ռազմաքաղաքական ղեկավարությունը, իսկ ՀՀ իշխանությունները ադրբեջանցի դիվերսանտին հանձնում են՝ «որպես բարի կամքի դրսևորում»
Թյուրքագետ Վարուժան Գեղամյանն, անդրադառնալով ՀՀ պետական սահմաանը հատած ադրբեջանցի զինծառայողին Բաքվին հանձնելու հայկական կողմի հայտարարությանը, շեշտել է՝ հայ ռազմագերիներն ավելի քան երեք տարի է՝ Բաքվի բանտերում խոշտանգվում են, Արցախի ռազմաքաղաքական ղեկավարությունը նույնպես գերեվարված է, իսկ ՀՀ իշխանությունները, «որպես բարի կամքի դրսևորում», ադրբեջանցի դիվերսանտին հանձնում են Բաքվին։
«Մի քանի տասնյակ հայ ռազմագերիներ արդեն ավելի քան երեք տարի է՝ Բաքվի բանտերում են (որոշները՝ խոշտանգումների ենթարկված)։
Արցախի ռազմաքաղաքական ղեկավարությունը կես տարի է՝ գերեվարված է Ադրբեջանի կողմից։
Հայաստանի Հանրապետության տարածքի մոտ 300 քառակուսի կմ գրավված է Ադրբեջանի ԶՈՒ կողմից։
Ադրբեջանը հավակնում է Հայաստանի նոր տարածքների ու խոսում է վերջնագրերով։
Այս ամենին զուգահեռ՝ Հայաստանի դե-ֆակտո իշխանությունները ադրբեջանցի դիվերսանտին հետ են հանձնում «որպես բարի կամքի դրսևորում»»,- գրել է թյուրքագետը։
Armenpress.am
Գևորգ Պապոյանը նշանակվել է ՀՀ էկոնոմիկայի նախարար
Գևորգ Պապոյանը նշանակվել է Հայաստանի Հանրապետության Էկոնոմիկայի նախարար: «Արմենպրես»-ի փոխանցմամբ՝ այս մասին նշված է ՀՀ նախագահի ստորագրած հրամանագրի մեջ.
«Հիմք ընդունելով վարչապետի առաջարկությունը՝ համաձայն Սահմանադրության 131-րդ հոդվածի, ինչպես նաև «Կառավարության կառուցվածքի և գործունեության մասին» օրենքի 5-րդ հոդվածի 1-ին մասի. Գևորգ ՊԱՊՈՅԱՆԻՆ նշանակել էկոնոմիկայի նախարար»:
Փետրվարի 14-ին ՀՀ նախագահ Վահագն Խաչատուրյանի հրամանագրով Վահան Քերոբյանն ազատվել է էկոնոմիկայի նախարարի պաշտոնից: Մինչև հրամանագիրը՝ Վահան Քերոբյանը «Ֆեյսբուք»-ի իր էջի գրառմամբ հայտարարել էր պաշտոնը թողնելու մասին:
Փետրվարի 26-ին Ազգային ժողովի «Քաղաքացիական պայմանագիր» խմբակցության պատգամավոր Գևորգ Պապոյանը հայտարարել էր պատգամավորական մանդատը վայր դնելու մասին:
