«Թալիբան». Մեզ չճանաչելը հետևանքներ կունենա աշխարհի համար
«Թալիբան»-ի ներկայացուցիչը զգուշացրել է, որ Աֆղանստանում թալիբների կառավարությանը պաշտոնապես չճանաչելը հետևանքներ կունենա տարածաշրջանի և աշխարհի համար:
Թասնիմ լրատվական գործակալության հաղորդման համաձայն, խոսքն ուղղելով ԱՄՆ-ին և աշխարհի այլ երկրներին, Զաբիհուլլահ Մուջահիդն ասել է.«Թալիբներին չճանաչելը և Աֆղանստանի ակտիվները չազատելը խնդիրներ կառաջացնեն այդ երկրի և աշխարհի համար»։
«Թալիբան» խմբավորման խոսնակը հույս է հայտնել, որ աշխարհը մոտ ապագայում կճանաչի թալիբներին՝ հավելելով. «Վերջերս Մոսկվայում կայացած հանդիպմանը երկրներն անուղղակիորեն դիմել են թալիբներին՝ որպես կառավարություն»։
Զաբիհուլլահ Մուջահիդը բոլոր երկրներին կոչ է արել ակտիվացնել իրենց քաղաքական ներկայացուցչությունն Աֆղանստանում։
Նա նաև ընդգծել է, որ թալիբները թույլ չեն տա որևէ երկրի ռազմաբազա հիմնել Աֆղանստանում։
Թալիբները Աֆղանստանում իշխանության են եկել օգոստոսի 15-ից: Սակայն ոչ մի երկիր դեռ պաշտոնապես չի ճանաչել խմբավորման ժամանակավոր կառավարությունը:
