Սաուդյան Արաբիան Բաշար Ասադին կհրավիրի մասնակցել արաբական երկրների ղեկավարների հանդիպմանը
Անգլիական լրատվական գործակալությունը հայտնում է, որ Սաուդյան Արաբիան մտադիր է Սիրիայի նախագահին հրավիրել մասնակցելու արաբական պետությունների ղեկավարների առաջիկա հանդիպմանը։
2012 թվականին Սաուդյան Արաբիան խզեց դիվանագիտական հարաբերությունները Սիրիայի հետ և փակեց իր հյուպատոսական գրասենյակը Դամասկոսում։
Ռոյթերսը հայտնում է. «Սիրիայի հետ ավելի քան մեկ տասնամյակ դիվանագիտական հարաբերությունների խզումից հետո, Սաուդյան Արաբիան նախատեսում է Բաշար Ասադին հրավիրել մասնակցելու արաբական երկրների ղեկավարների հանդիպմանը, որը տեղի կունենա մայիսի 19-ին՝ Էր Ռիադում»։
Գործակալությունը նշում է, որ Սաուդյան Արաբիայի արտաքին գործերի նախարար Ֆեյսալ բեն Ֆարհան Ալ Սաուդն առաջիկա շաբաթներին կմեկնի Դամասկոս՝ հանդիպմանը մասնակցելու պաշտոնական հրավերն Ասադին փոխանցելու նպատակով։
Մարտի վերջին Սաուդյան Արաբիայի ԱԳՆ-ն հաստատել է Սիրիայի արտաքին գործերի նախարարության հետ հյուպատոսական ծառայությունների մատուցումը վերսկսելու շուրջ բանակցությունների մասին լուրերը:
Արաբական շատ երկրներ վերջերս կոչ են արել Սիրիան վերադարձնել Արաբական լիգա: Դամասկոսի անդամակցությունն այս կազմակերպությանը դադարեցվել էր 2011 թվականին՝ սիրիական ճգնաժամի և քաղաքացիական պատերազմի հետևանքով։