ԱՄՆ-ի բանակը պատրաստվում է Վենեսուելայի դեմ քայլեր իրականացնել
ԱՄՆ-ի ռազմական պաշտոնյան տեղեկացրել է, որ այդ երկրի բանակը Վենեսուելայի ինքնահռչակ նախագահի իշխանությունն ամրապնդելու պատրաստություն է տեսնում, եթե վերջինիս հաջողվի այդ երկրում պետական հեղաշրջում իրականացնել:
ԱՄՆ Զինված ուժերի հարավային հրամանատարության կենտրոնի հրամանատար Քրեյգ Ֆոլերն այդ երկրի Ներկայացուցիչների պալատի Զինված ուժերի կոմիտեի նիստում ասել է.«ԱՄՆ-ի բանակը պլաններ է մշակել այն ժամանակվա համար, երբ ընդդիմադիրների առաջնորդ Խուան Գուայդոն Վենեսուելայի նախագահ Նիկոլաս Մադուրոյից իշխանությունն իր ձեռքը կվերցնի»:
Ամերիկացի հրամանատարը հավելել է.«ԱՄՆ-ի բանակը պատրաստ է սեղանին դրված բոլոր այն տարբերակների համար, որոնց մասին հայտնել է ԱՄՆ նախագահ Դոնալդ Թրամփը»:
Ապրիլի 30-ին ընդդիմությունը փորձել է հեղաշրջում անել Վենեսուելայում: Ընդդիմության առաջնորդ Խուան Գուայդոն, որն իրեն երկրի ժամանակավոր նախագահ է հռչակել, իր աջակիցների հետ հավաքվել է Կարակասի «Կառլոտա» ռազմաբազայի մոտ, և ռազմական ընդվզման կոչ է արել երկրի ժողովրդին ու բանակին:
Դա այն դեպքում, երբ Վենեսուելայի նախագահ Նիկոլաս Մադուրոն հայտարարել է, որ Զինված ուժերը շարունակում են հավատարիմ մնալ երկրի իշխանություններին, և որ փոքր խմբի կողմից ձեռնարկված պետական հեղաշրջման փորձը ձախողվել է:
