Լավրովն արձագանքել է Ֆրանսիայի և ԱՄՆ պահանջին
Ռուսաստանը տեղեկացրել է ԵԱՀԿ Մինսկի խմբի համանախագահող մյուս երկրներին` ԱՄՆ-ին եւ Ֆրանսիային, Լեռնային Ղարաբաղի հակամարտության կարգավորման իր ջանքերի մասին:
Ինչպես տեղեկացնում է «Արմենպրես»-ը, վկայակոչելով ՏԱՍՍ-ը, այս մասին հայտնել է ՌԴ արտաքին գործերի նախարար Սերգեյ Լավրովը՝ Լեռնային Ղարաբաղում հումանիտար հարցերի լուծման վերաբերյալ խորհրդակցության ժամանակ:
«Մենք մեր գործընկերներին մանրամասն տեղեկացրել ենք, նախ և առաջ Ֆրանսիային և ԱՄՆ-ին ՝ որպես ԵԱՀԿ Մինսկի խմբի համանախագահների: Ես խոսել եմ Ֆրանսիայի արտգործնախարարի հետ, մանրամասն ներկայացրել իրավիճակը և այն ջանքերը, որոնք մենք ձեռնարկել ենք: Մենք խոսել ենք նաև ամերիկացի գործընկերների հետ: Նյու Յորքում ՄԱԿ-ի Անվտանգության խորհուրդը լիովին տեղեկացված է եղել այն ջանքերի մասին, որոնք ձեռնարկվել են Ռուսաստանի կողմից և թույլ են տվել համաձայնության գալ նոյեմբերի 9-ին», – նշել է Լավրովը:
Նշենք, որ նոյեմբերի 9-ի հայտարարությունից հետո ԱՄՆ Պետքարտուղարության ներկայացուցիչն ու Ֆրանսիայի արտաքին գործերի նախարարը հայտարարել էին, որ ի գիտություն են ընդունել պատերազմի ավարտի վերաբերյալ հայտարարությունը, ուսումնասիրում են դրա պայմաններն ու հետևանքները և ակնկալում են պարզաբանումներ դրանց ազդեցությունը գնահատելու համար:
lragir.am
