Բորելն ընդգծել է բոլոր անդամների կողմից ՀԳՀԾ-ի լիարժեք գործադրման անհրաժեշտությունը
ԵՄ արտաքին քաղաքականության պատասխանատու Ջոզեֆ Բորելը, երեքշաբթի օրն իր թվիթերյան օգտահաշվում արած գրառման մեջ նշել է. «ԻԻՀ ԱԳ նախարար Զարիֆի հետ քննարկել եմ Բրյուսելի և Թեհրանի միջև հարաբերությունները և ընդգծել ՀԳՀԾ-ի լիարժեք գործադրման անհրաժեշտությունը»:
ԻՌՆԱ-ի հաղորդման համաձայն, Բորելը հավելել է. «Որպես ՀԳՀԾ-ի համակարգող, շարունակելու ենք մեր ջանքերը՝ բոլոր անդամների կողմից ՀԳՀԾ-ի լիարժեք գործադրումն ապահովելու ուղղությամբ»:
Հաղորդման համաձայն, Զարիֆի հետ հեռախոսազրույցում, ԵՄ արտաքին քաղաքականբության պատասխանատուն, ընդգծելով իրանցի միջուկային գիտնական Մոսեն Ֆախրիզադեի սպանության հանցագործ բնույթը, անդրադարձել է այդ կապակցությամբ ԵՄ-ի դիրքորոշմանը:
Նույն օրը կայացած՝ «ԵՄ արտաքին քաղաքականությունը վերջին տասնամյակի ընթացքում» թեմայով կլոր սեղանի ժամանակ, Բորելը հայտարարել է. «Մենք չենք կարող Իրանի միջուկային տերություն դառնալը կանխել միջուկային գիտնականների սպանությամբ»:
Քննարկման ժամանակ, առանց ուղղակի կերպով նշելու այս ողբերգական սպանության մեղավորներին, Բորելը հայտարարել է. «Որոշ շրջանակներ չեն ցանկանում, որպեսզի ՀԳՀԾ-ն վերակենդանանա և դա այն պայմաններում, երբ չնայած համաձայնությունից ԱՄՆ-ի դուրս գալուն, մենք ջանքեր ենք գործադրել այն պահպանելու ուղղությամբ»:
