Ֆրանսիայի և Վրաստանի նախագահները քննարկել են իրավիճակը Անդրկովկասում
Ֆրանսիայի նախագահ Ֆրանսուա Օլանդը Վրաստանի նախագահ Գեորգի Մարգվելաշվիլու հետ քննարկել է իրավիճակը Անդրկովկասում, երկկողմ հարաբերությունների հարցերը և միջազգային օրակարգը, հայտնում է RIA Novosti-ն՝ հղում կատարելով Ելիսեյան պալատին:
«Հանրապետության նախագահն այսօր ընդունել է Վրաստանի նախագահ Գեորգի Մարգվելաշվիլուն, որը պատասխան պաշտոնական այցով գտնվում է Ֆրանսիայում` Հանրապետության նախագահի 2014 թվականի մայիսի 13-ին Թբիլիսի կատարած այցից հետո: Պետությունների ղեկավարները քննարկել են երկկողմ հարաբերությունների ամբողջ սպեկտրը»,- գրված է կոմյունիկեում:
Օլանդի վարչակազմում նշել են, որ երկխոսության հիմնական թեմաներից մեկը դարձել է Ֆրանսիայի և Վրաստանի տնտեսական հարաբերությունների հեռանկարը: Վերջին տաս տարում Վրաստանում Ֆրանսիայի արտահանման ծավալը աճել է երեք անգամ:
«Նրանք նաև քննարկել են միջազգային օրակարգը` մասնավորապես իրավիճակը Հարավային Կովկասում»,- հայտնել են Ելիսեյան պալատում:
