ՄԱԿ-ն ահազանգել է երեխաների դեմ կիրառվող բռնությունների կապակցությամբ
ՄԱԿ-ն ահազանգել է ռազմական հակամարտություններում երեխաների նկատմամբ կիրառվող բռնությունների և կորոնավիրուսի պանդեմիայի պայմաններում նրանց խոցելիության կապակցությամբ:
Երեխաների և զինված հակամարտությունների հարցերով ՄԱԿ-ի գլխավոր քարտուղարի հատուկ ներկայացուցիչ Վիրջինիա Գամբան ասել է.«Վերջին տարիներին ռազմական հակամարտություններում երեխաների նկատմամբ բռնությունները լուրջ մտահոգության տեղիք են տվել, իսկ Covid 19-ն իր հերթին խորացրել է երեխաների խոցելիությունը»:
«Անցած մեկ տարվա ընթացքում տեղի ունեցած ռազմական հակամարտություններում ավելի քան 19 հազար 300 երեխաներ դարձել են բռնությունների, ներառյալ հարկադիր աշխատանքի ու սեռական շահագործման զոհ»,- հավելել է Գամբան:
ՄԱԿ-ը երկուշաբթի օրը հայտարարել է, որ անցյալ տարի աշխարհի տարբեր հակամարտություններում ավելի քան 8500 երեխա օգտագործվել է որպես զինվոր, ևս շուրջ 2700 երեխա զոհվել է:
