Յենս Սթոլթենբերգը չի երկարաձգի իր պաշտոնավարման ժամկետը. ԶԼՄ
ՆԱՏՕ-ի գլխավոր քարտուղար Յենս Սթոլթենբերգը հոկտեմբերին կավարտի իր լիազորությունները, ինչպես նախատեսված էր, հայտարարել է դաշինքի խոսնակ Օանա Լունգեսկուն, հայտնում է Reuters լրատվական գործակալությունը։
«Գլխավոր քարտուղար Յենս Սթոլթենբերգի մանդատը երկարացվել է երեք անգամ, եւ նա այդ պաշտոնը զբաղեցրել է ընդհանուր առմամբ գրեթե ինը տարի», - ասել է ՆԱՏՕ-ի խոսնակ Օանա Լունգեսկուն․ «Գլխավոր քարտուղարի պաշտոնավարման ժամկետն ավարտվում է այս տարվա հոկտեմբերին, եւ նա մտադիր չէ ձգտել իր մանդատի երկարաձգմանը»։
Ավելի վաղ Welt am Sonntag-ը հայտնել էր, որ Սթոլթենբերգի պաշտոնավարման ժամկետը կրկին պետք է երկարացվի, քանի որ դաշինքը ձգտում է ուկրաինական պատերազմի ընթացքում պահպանել կայունությունը:
Սթոլթենբերգի պաշտոնավարման ժամկետը, որը մասնագիտությամբ տնտեսագետ է եւ Նորվեգիայի աշխատավորական կուսակցության նախկին առաջնորդը, անցյալ տարի երկարաձգվել է:
Նա եղել է Նորվեգիայի վարչապետը 2000-ից 2001 եւ 2005-ից 2013 թվականներին՝ հաջորդ տարի դառնալով ՆԱՏՕ-ի ղեկավարը:
Դեռեւս որոշում չի կայացվել, թե ով կփոխարինի Սթոլթենբերգին, սակայն Իսպանիայի վարչապետ Պեդրո Սանչեսը եւ Մեծ Բրիտանիայի պաշտպանության նախարար Բեն Ուոլեսը այդ պաշտոնի առաջատար թեկնածուներից են, հայտնում է Welt am Sonntag-ը:
news.am
