Ֆրանսիայում ձերբակավել է 120 ցուցարար
Հինգշաբթի օրը, երբ Ֆրանսիայի վարչապետ Էլիզաբեթ Բորտը հայտարարեց, որ կօգտագործի 49.3-րդ հոդվածը (Ֆրանսիայի սահմանադրության հատուկ կետ)՝ առանց խորհրդարանի քվեարկության հաստատելու կենսաթոշակային բարեփոխումների օրինագիծը, զայրացած ֆրանսիացիները կրկին դուրս են եկել փողոցներ:
Le Monde թերթը հայտնում է, որ Էմանուել Մակրոնը հինգշաբթի օրը որոշում է կայացրել՝ 49.3-րդ հոդվածի կիրառմամբ, շրջանցելով խորհրդարանը, հաստատել կենսաթոշակային տարիքը 62-ից 64 տարեկանի բարձրացնելու վիճահարույց օրինագիծը:
Թերթը գրում է, որ այս մասին հայտարարությունից հետո, զայրացած ֆրանսիացիները դուրս են եկել փողոցներ, իսկ ոստիկանությունը, ցուցարարներին ցրելու համար, կիրառել է արցունքաբեր գազ և ջրցան մեքենաներ: 120 ցուցարար ձերբակալվել է՝ հանրային գույքը վնասելու մեղադրանքով:
AFP գործակալությունը հաղորդել է, որ ցույցերի դադարելուց հետո, մի խումբ ցուցարարներ վառել են տարբեր իրեր և վնասել մոտակա խանութների գույքը:
Հաղորդվում է նաև, որ Մարսելի հարավում, բողոքի ակցիաների ժամանակ, թալանվել են մի շարք խանութներ, իսկ արևմտյան Նանտ և Ռեն քաղաքներում բախումներ են տեղի ունեցել ցուցարարների և անվտանգության ուժերի միջև։
Վերջին շաբաթների հարցումները ցույց են տվել, որ ֆրանսիացիների մոտ երկու երրորդը դեմ է կենսաթոշակային բարեփոխումներին:
