G7. Պետք է արագացնել էներգիայի վերականգնվող աղբյուրների զարգացումը
«Մեծ յոթնյակի» երկրները պայմանավորվել են արագացնել էներգիայի վերականգնվող աղբյուրների զարգացումը և կոչ են արել կրճատել բնական գազի օգտագործումը, քանի որ իրենք ձգտում են արագացնել աստիճանական հրաժարումը վառելիքի հանածո տեսակներից, ասվում է կիրակի ընդունված խմբի հայտարարության մեջ, հաղորդում է Reuters-ը։
«Մենք կտրուկ կավելացնենք էլեկտրաէներգիայի արտադրությունը ի հաշիվ էներգիայի վերականգնվող աղբյուրների»,- ասվում է հայտարարության մեջ, որում անդամ երկրները պարտավորվում են արդեն 2030 թ․ ծովային քամու կայանքների հզորությունը հասցնել 150 գիգավատի, իսկ արևային կայանքներինը՝ ավելի քան 1 տերավատի։
G7 անդամները նաև պայմանավորվել են արագացնել «փուլային հրաժարումը վառելիքի հանածո տեսակների անընդհատ օգտագործումից»։
«Մեծ յոթնյակի» երկրները երկօրյա հանդիպումների նպատակով հավաքվել են ճապոնական հյուսիսային Սապորո քաղաքում՝ կլիմայի, էներգետիկայի և բնապահպանական քաղաքականության հարցերը քննարկելու համար։
Հյուրընկալող երկիրը՝ Ճապոնիան, որի էներգետիկ գրեթե բոլոր պահանջմունքները կախված են ներկրումից, ցանկանում է հեղուկ բնական գազը, որպես անցումային վառելիք, պահպանել առնվազն 10-15 տարի։
news.am
