Լոգիստիկ խնդիրները բարդացնում են Հյուսիս-Հարավով Իրանի հետ Ռուսաստանի առևտուրը
Հյուսիս-Հարավ միջազգային տրանսպորտային միջանցքով Իրանի տարածքով արտահանման զարգացումը բարդանում է լոգիստիկ խնդիրների պատճառով։ Այս մասին հայտնում է «Կոմերսանտ»-ը։
Հյուսիս-Հարավ միջազգային տրանսպորտային միջանցքում ռուսական հացահատիկի արտահանման ներուժը մինչև 2030 թվականը գնահատվում է 30 միլիոն տոննա, ասել է TransAsia Logistics-ի ներկայացուցիչ Արկադի Իվանովը։ Այնուամենայնիվ, ապրանքաշրջանառության զարգացմանը խոչընդոտում են ֆինանսական հաշվարկների հետ կապված դժվարությունները, Կասպից ծովի նավահանգիստներում ենթակառուցվածքների բացակայությունը և նավերի պակասը:
Իվանովի խոսքով, հիմնական խնդիրը լոգիստիկ ծառայությունների և արտահանման-ներմուծման գործառնությունների համար վճարումների կազմակերպումն է։ Իրանում դրանք հիմնականում իրականացվում են կանխիկ եղանակով։ Նա նաև նշել է Կասպից ծովի նավահանգիստների ծանծաղացումը և բեռների նավատորմի պակասը։
Ռուսական ընկերությունները հայտարարել են Կասպից ծովում նավերի քանակն ավելացնելու ծրագրերի մասին։ Մինչև 2030 թվականը մոտ 20 նավ կպահանջվի, իսկ մինչև 2050 թվականը` 50: Այնուամենայնիվ, Իրանում դիզվառելիքի ցածր արժեքը ավտոմոբիլային տրանսպորտն ավելի էժան է դարձնում, քան երկաթուղային տարանցումը:
Հոկտեմբերի սկզբին Պուտինը խոսել էր Հյուսիս-Հարավ տրանսպորտային միջանցքի նախագծի իրականացման մասին:
