Քամալա Հարիսը պաշտոնապես ընդունել է ԱՄՆ նախագահական ընտրություններում իր թեկնածությունը

Քամալա Հարիսը պաշտոնապես ընդունել է 2024թ․ ԱՄՆ նախագահական ընտրություններում իր թեկնածությունը։

ԻՌՆԱ-ի հաղորդմամբ՝ Դեմոկրատական կուսակցության քառօրյա ազգային համագումարի վերջին օրն ունեցած ելույթում, ընդունելով  իր թեկնածությունը, Քամալա Հարիսը դիմել է հանրապետականներին, ասելով․ «Հաղթանակի դեպքում նախագահը կլինի բոլոր ամերիկացիների նախագահը, և ես երկիրը վեր կդասեմ կուսակցությունից և իմ անձից»։

Հարիսը վերջերս հայտարարել էր, որ ընտրվելու դեպքում կընդունի  պարենային ապրանքների գների բարձրացման դաշնային արգելքի մասին օրենք և պետական սուբսիդիաներ կհատկացնի բնակարանների գնման համար։

Արձագանքելով Հարիսի հայտարարությանը, հանրապետականների թեկնածու Դոնալդ Թրամփը նշել է, որ այդ քաղաքականությունն ու ծրագիրը կոմունիստական են և կհանգեցնեն ԱՄՆ-ի կործանմանը։

ԱՄՆ նախագահական ընտրությունները տեղի կունենան 2024 թվականի նոյեմբերի 5-ին։ Ընտրություններում կմրցեն դեմոկրատների թեկնածու Քամալա Հարիսը և հանրապետականների թեկնածու Դոնալդ Թրամփը։