Պեսկովը «գողություն» է որակել Կիևին ռուսական ակտիվներից եկամուտների փոխանցումը
Ռուսական ակտիվներից եկամուտների փոխանցումն Ուկրաինա անօրինական է և Եվրամիության համար անհետևանք չի մնա։
Ինչպես գրում է ՏԱՍՍ-ը, այս մասին լրագրողների հետ զրույցում ասել է ՌԴ նախագահի մամուլի քարտուղար Դմիտրի Պեսկովը՝ մեկնաբանելով Եվրամիության արտաքին գործերի և անվտանգության քաղաքականության գերագույն ներկայացուցիչ Ժոզեպ Բորելի հայտարարությունը։
«Դրանք անօրինական գործողություններ են և անպայման կունենան իրավական հետևանքներ։ Սա ոչ այլ ինչ է, քան ապօրինի սեփականազրկում, ռուսերեն ասած՝ մեր փողերի, մեր ունեցվածքի գողություն», - նշել է դիվանագետը:
Ավելի վաղ Բորելը լրագրողների հետ զրույցում ասել էր, որ Բրյուսելը ռուսական սառեցված ակտիվներից ստացված եկամուտներից 1,4 մլրդ եվրո է ուղարկել Ուկրաինային, ինչպես նաև ԵՄ պետություններին որպես փոխհատուցում Կիևին զենքի մատակարարումների համար։
