ԱՄՆ-ն երկարաձգել է Իրանի նկատմամբ ազգային արտակարգ դրությունը

ԱՄՆ նախագահը ևս մեկ տարով երկարաձգել է Իրանի նկատմամբ ազգային արտակարգ դրությունը։

ISNA-ի փոխանցմամբ՝ ԱՄՆ նախագահ Դոնալդ Թրամփը ևս մեկ տարով երկարաձգել է Իրանի նկատմամբ «ազգային արտակարգ դրությունը», որը ներառում է Իրանի Իսլամական Հանրապետության նկատմամբ միակողմանի պատժամիջոցներ։
Որոշման մասին հայտարարվել է ուրբաթ օրը՝ ԱՄՆ կառավարության պաշտոնական փաստաթղթերի համակարգի՝ Federal Register-ի կայքում հրապարակված հայտարարության մեջ։
Հայտարարության մեջ ասվում է․  «Իրանի հետ հարաբերությունները դեռևս չեն կարգավորվել, և 1981 թվականի հունվարի 19-ի երկկողմ համաձայնագրերի իրականացման գործընթացը դեռևս շարունակվում է»։ 
Այս համաձայնագրերը վերաբերում են Իրանի և Միացյալ Նահանգների միջև կնքված «Ալժիրի համաձայնագրին», որը հանգեցրեց 1979 թվականի հեղափոխությունից հետո Թեհրանում մեկ տարուց ավելի բանտարկված ամերիկացի դիվանագետների ազատ արձակմանը։ Այս փաստաթղթերը հատկապես ընդգծում են միմյանց ներքին գործերին չմիջամտելու սկզբունքը։
Թրամփը հայտարարել է. «Այս պատճառով 1979 թվականի նոյեմբերի 14-ին հայտարարված արտակարգ դրությունը և դրա դեմ պայքարի համար ձեռնարկված միջոցառումները ուժի մեջ կմնան 2025 թվականի նոյեմբերի 14-ից հետո։ Ես ևս մեկ տարով երկարաձգում եմ Իրանի նկատմամբ ազգային արտակարգ դրությունը»։
1979 թվականի նոյեմբերի 14-ին, ի պատասխան Թեհրանում «ամերիկացի դիվանագետների պատանդ վերցնելու» գործողությունների, ԱՄՆ 39-րդ նախագահ Ջիմի Քարթերը ստորագրեց 12170 գործադիր հրամանագիրը: ԱՄՆ ֆինանսների նախարարությանը հանձնարարվեց սառեցնել ԱՄՆ-ում գտնվող իրանական բոլոր պաշտոնական ակտիվները, այդ թվում՝ բանկային հաշիվները:
Այս որոշումը փաստացի սկիզբ դրեց Իրանի դեմ առաջին տնտեսական պատժամիջոցներին: 1980 թվականի ապրիլի 7-ին Քարթերը խզեց դիվանագիտական հարաբերությունները Թեհրանի հետ և արգելեց բոլոր տեսակի ամերիկյան ապրանքների արտահանումը Իրան, այդ թվում՝ սննդամթերքի և դեղորայքի: Արգելվեց նաև իրանական ապրանքների ներմուծումը Միացյալ Նահանգներ և ամերիկացի քաղաքացիների ուղևորությունն Իրան: