Փեզեշքյան․ BRICS-ի շրջանակում Իրանի և Հնդկաստանի համագործակցությունը պետք է ընդլայնվի
ԻԻՀ նախագահ Մասուդ Փեզեշքյանը Հնդկաստանի վարչապետ Նարենդրա Մոդիի հետ ունեցած հեռախոսազրույցում ընդգծել է երկկողմ հարաբերությունների զարգացման և BRICS-ի շրջանակում համագործակցության ընդլայնման անհրաժեշտությունը։
Pars Today-ի հաղորդմամբ՝ անդրադառնալով Թեհրանի և Նյու Դելիի միջև պատմական կապերին, Փեզեշքյանը նշել է, որ երկու երկրներն ունեն լայն հնարավորություններ քաղաքական, տնտեսական, առևտրային, տարանցիկ և միջազգային ոլորտներում։ Նա կոչ է արել առավել արդյունավետ օգտագործել այդ ներուժը և ձևավորել համագործակցության նոր ուղղություններ։
Իրանի նախագահը նաև ընդգծել է, որ տարածաշրջանային և միջազգային բազմաթիվ հարցերի վերաբերյալ Իրանի և Հնդկաստանի մոտեցումների համընկնումը բարենպաստ հիմք է ստեղծում երկու երկրների ռազմավարական համագործակցության ամրապնդման համար։ Նա հույս է հայտնել, որ Թեհրանի և Նյու Դելիի փոխգործակցությունը BRICS-ի շրջանակում հետագայում ևս կընդլայնվի։
Զրույցի ընթացքում Հնդկաստանի վարչապետ Նարենդրա Մոդին, կարևորելով Արևմտյան Ասիայում խաղաղության և կայունության հաստատումը, նշել է, որ տարածաշրջանի անվտանգությունը կարևոր նշանակություն ունի համաշխարհային կայունության համար։
Մոդին Իրանի նախագահ Մասուդ Փեզեշքյանին հրավիրել է մասնակցել BRICS-ի առաջնորդների գագաթնաժողովին, որը կանցկացվի Հնդկաստանի հյուրընկալությամբ։