Գեներալ-մայոր Աբդոլլահի․ Նոր պատերազմը բոլորին է ներքաշելու իր մեջ

Իրանի Իսլամական Հանրապետության զինված ուժերի գլխավոր շտաբի պետ, «Խաթամ ալ-Անբիա» կենտրոնական ռազմակայանի հրամանատար, գեներալ-մայոր օդաչու Ալի Աբդոլլահին նախազգուշացրել է․ «Եթե նոր պատերազմ սկսվի Իրանի դեմ, դրա կրակը տարածվելու է բոլորի վրա»։

Pars Today-ը, IRIB-ին հղում անելով, հայտնում է, որ Իրանի Իսլամական Հանրապետության զինված ուժերի գլխավոր շտաբի պետ և «Խաթամ ալ-Անբիա» կենտրոնական ռազմակայանի հրամանատար, գեներալ-մայոր օդաչու Ալի Աբդոլլահին, նշելով, որ ԱՄՆ-ի և Իսրայելական ռեժիմի կողմից Իրանի դեմ պարտադրված պատերազմներն ավարտվել են ձախողմամբ, ասել է․ «ԱՄՆ-ի չարամիտ նախագահը և սիոնիստական հանցավոր խմբավորման ղեկավարը տարբեր ոլորտներում բախվել են լուրջ ճգնաժամերի և կրկին փորձում են, միջուկային զենք ձեռք բերելու Իրանի ձգտման մասին մեծ սուտը որպես պատրվակ օգտագործելով, նոր պատերազմ սկսել Իրանի դեմ»։

Գեներալ-մայոր Աբդոլլահին, ներկայացնելով իր տեսակետներն, ընդգծել է․

• 1․ Իրանի ժողովուրդը, ունենալով հազարամյակների պատմություն ունեցող քաղաքակրթություն, միշտ պայքարել է անարդարության դեմ և ձգտել արդարության ու երբեք չի նահանջի որևէ բռնապետի առջև։
• 2․ Սիոնիստական ռեժիմը, սխալ հաշվարկի հետևանքով, Իրանի դեմ սկսեց 12-օրյա պատերազմը և Ռամադանի պատերազմը, սակայն Իրանի զինված ուժերի հզոր հարվածներից հետո դիմեց պատերազմը դադարեցնելու խնդրանքով։ Այս ռեժիմն այժմ և ոչ մի այլ ժամանակ ի վիճակի չէ առճակատման մեջ մտնել հզոր Իրանի հետ։
• 3․ ԱՄՆ-ի ինքնասիրահարված նախագահը պետք է իմանա, որ Իրանը չի սպասում ԱՄՆ Կոնգրեսի ընտրությունների արդյունքներին, և Իրանի դեմ ցանկացած գործողության դեպքում զինված ուժերն անմիջապես և առանց որևէ սահմանափակման թիրախավորելու են ԱՄՆ-ի շահերը։
• 4․ Տարածաշրջանում ԱՄՆ-ին հյուրընկալող երկրները պետք է իմանան, որ անապահովության հիմնական պատճառը ԱՄՆ-ի ահաբեկչական բանակի ներկայությունն է, և եթե նոր պատերազմ սկսվի, դրա կրակը տարածվելու է բոլորի վրա։
• 5․ Մենք նախազգուշացնում ենք միջազգային կազմակերպություններին, հատկապես Ատոմային էներգիայի միջազգային գործակալությանը, զերծ մնալ գառան մորթի հագած գայլի դերակատարումից։

Վերջում նա ընդգծել է․ «Իսլամական Իրանը, առավել ուժեղ, քան երբևէ, լիովին պատրաստ է դիմակայելու ցանկացած սպառնալիքի և հույսը դնում է Աստծո օգնության վրա»։