Բեռլինում ահաբեկչությունը չպետք է փակի փախստականների ուղին դեպի Եվրոպա. Յունկեր

Բեռլինում ահաբեկչությունը չպետք է փակի փախստականների ուղին դեպի Եվրոպա։ Նման կարծիք է հայտնել Եվրահանձնաժողովի նախագահ Ժան-Կլոդ Յունկերը, գրում է «ՌԻԱ Նովոստի» գործակալությունը։

Հիշեցնենք, որ երկուշաբթի երեկոյան բեռնատարը մխրճվել էր Բեռլինի կենտրոնում սուրբծննդյան տոնավաճառ այցելած ամբոխի մեջ՝  խլելով 12 մարդու կյանք։ Գերմանիայի իշխանությունները կատարվածն ահաբեկչություն են անվանել։ Reuters գործակալության տվյալների համաձայն՝  հարձակման պատասխանատվությունը ստանձնել է «Իսլամական պետություն» ահաբեկչական խմբավորումը։ Կատարվածի համար կասկածվող 24-ամյա թունիսցի Անիս Ամրին, որի նկատմամբ հետախուզում էր հայտարարվել, սպանվել է Իտալիայում՝ ոստիկանության հետ փոխհրաձգության ժամանակ։ «Եվրոպան պետք է ապաստան տրամադրի մարդկանց, որոնք փախչում են հակամարտության գոտիներից կամ ահաբեկչությունից։ Սխալ է բոլոր փախստականներին կասկածել ահաբեկչության համար»,- ասել է Յունկերը:
Միևնույն ժամանակ, քաղաքական գործիչն ընդգծել է Եվրամիության ներքին անվտանգության ամրապնդման անհրաժեշտությունը։

lratvakan.am/