Amnesty International-ը մտահոգված է ևս երկու բահրեյնցիների մահապատժի գործադրման կապակցությամբ
Amnesty International կազմակերպությունը հայտարարել է, որ Բահրեյնը մարդու իրավունքների ճգնաժամի սեմին է կանգնած և անհապաղ պիտի չեղարկի բահրեյնցի երկու ակտիվիստների մահապատժի դատավճիռը:
Բահրեյնի դատարանը 2014 թվականի դեկտեմբերին անհիմն մեղադրանքներով մահապատժի դատապարտեց Մոհամմեդ Ռամազանին և Հոսեյն Ալի Մուսային:
Համաձայն «Ալ-Ալամ» հեռուստակայանի հաղորդման, կազմակերպությունն իր հաղորդագրության մեջ հայտարարել է, որ վերջիններս հարցաքննության ընթացքում զրկված են եղել փաստաբանի ծառայություններից և նրանց ցուցմունքները տրվել են կտտանքների ներքո:
Amnesty International կազմակերպությունն ավելի վաղ բողոք էր ներկայացրել երեք բահրեյնցիների մահապատժի գործադրման կապակցությամբ:
Ալե Խալիֆայի ռեժիմը հունվարի 15-ի վաղ առավոտյան գնդակահարեց ընդդիմադիր ակտիվիստներ Սամի Մաշիմային, Ալի Սանքիսին և Աբբաս Սամիին:
Այս երիտասարդներին 2014 թվականի մարտին «Ալդիա»-ի տարածքում ոստիկանության ուժերի դեմ հարձակման կեղծ մեղադրանք էր առաջադրվել:
Հիշյալ երեք անձանց մահապատժի գործադրումն արժանացավ ներքին ու միջազգային ծավալուն բողոքների:
