Էրդողանը միջազգային ամբիոնն օգտագործել է հակահայկական կոչերի համար

Թուրքիայի նախագահ Ռեջեփ Թայիփ Էրդողանն օգտագործել է Տնտեսական համագործակցության կազմակերպության ամբիոնը հակահայկական հայտարարություններ հնչեցնելու նպատակով:

Ինչպես հաղորդում է «Արմենպրես»-ը` վկայակոչելով թուրքական Haberler-ը, Էրդողանն Իսլամաբադում կազմակերպության 13-րդ գագաթնաժողովի ժամանակ հայտարարել է, որ իրենք ղարաբաղյան հակամարտության հարցը պետք է քննարկեն կառույցի բոլոր նիստերում և հայկական ուժերն անվանել է «օկուպանտ»: Թուրքիայի նախագահի խոսքով` որքան էլ որ կառույցը տնտեսական բնույթ ունի, այդուհանդերձ դրա շրջանակները ներառում են նաև քաղաքականությունը:

Տնտեսական համագործակցության կազմակերպությունը հիմնադրվել է 1985 թվականին Թեհրանում` Իրանի, Պակիստանի և Թուրքիայի կողմից: Ներկայում կազմակերպության մեջ են մտնում 10 անդամ` Աֆղանստանը, Ադրբեջանը, Իրանը, Ղազախստանը, Ղրղզստանը, Պակիստանը, Տաջիկստանը, Թուրքիան, Թուրքմենստանը և Ուզբեկստանը: 

Armenpress.am