ԱՄՆ-ում գաղտնազերծել են միջուկային զենքի փորձարկման հարյուրավոր տեսագրություններ. Business Insider

ԱՄՆ-ի Էներգետիկայի նախարարության Էռնեստ Լոուրենսի անվան Լիվերմորյան ազգային լաբորատորիայի ֆիզիկոս Գրեգ Սպրիգսն իր գործընկերների հետ հավաքել և համացանցում հրապարակել է հարյուրավոր գաղտնազերծված տեսանյութեր, որոնցում ցուցադրվում են միջուկային զենքի փորձարկումները մթնոլորտում: Այս մասին հայտնում է Business Insider-ը:

Աղբյուրի հաղորդմամբ` Սպրիգսի գլխավորությամբ փորձագետների թիմը վերականգնել է 1945-1962 թվականներին ԱՄՆ-ում իրականացված միջուկային փորձարկումների ժապավենները: Ներկա պահին մասնագետների տրամադրության տակ առկա է մոտ 6,5 հազար տեսահոլովակ, որոնցից թվայնացվել է մոտ 4,2 հազարը, ևս 750-ը գաղտնազերծվել է:

Նշվում է, որ 1945-1962 թվականներին ԱՄՆ-ն 210 միջուկային փորձարկում է իրականացրել մթնոլորտում, որոնցից արվել է մոտ 10 հազար տեսագրություն: Դրանց մեծամասնությունը բաշխվել է ԱՄՆ-ի գաղտնի պահեստներում:

Հայտնի է, որ փորձագետների թիմին 5 տարի է պահանջվել տեսագրությունները լաբորատորիայում հավաքելու համար:

http://www.tert.am/am/