Լուկաշենկո. Պետք է լուծել հետխորհրդային տարածքի հակամարտությունները
ԱՊՀ-ն պետք է ակտիվ դերակատարում ունենա հետխորհրդային տարածքում հակամարտությունների լուծման գործում: «Ռիա Նովոստի» գործակալության փոխանցմամբ, այս մասին հայտարարել է Բելառուսի նախագահ Ալեքսանդր Լուկաշենկոն «Միր» հեռուստաընկերության հետ հարցազրույցի ժամանակ:
«Եթե մենք ԱՊՀ շրջանակներում լուծեինք Մերձդնեստրի, Լեռնային Ղարաբաղի, Դոնբասի խնդիրները... բայց մենք դա չենք անում: Եվ չենք անում, ոչ թե նրա համար, որ չի կարելի, այլ տարբեր են հետաքրքրությունները: Իսկ խնդիրը անհրաժեշտ է լուծել»,- հայտարարել է Լուկաշենկոն:
Բելառուսի նախագահի խոսքով, նշված հակամարտությունների լուծման համար անհրաժեշտ է հաշվի առնել մարդկանց հետաքրքրությունները:
«Լեռնային Ղարաբաղում մարդիկ լա՞վ են ապրում՝ անընդհատ առնչվելով որոշակի ռազմական խնդիրների հետ: Նրանք ուղղակի ապրում և սպասում են, որ վաղը ինչ-որ բան տեղի է ունենալու, Աստված մի արասցե ռումբը ընկնի գլխներին: Դա նորմա՞լ է: Ո՞ւմ համար է դա շահավետ: Ոչ ոքի»,- նշել է նա:
Լուկաշենկոն նաև համոզմունք է հայտնել, որ նախևառաջ պետք է լուծել այդ խնդիրները, որոնք ԱՊՀ-ի առաջնային օրակարգում են, ապա նոր նայել ապագային:
«Լուծելով այդ խնդիրները, մենք կտեսնենք նոր ռազմավարական ուղղություններ, որոնց առնչությամբ անհրաժեշտ կլինի աշխատել»,- նշել է Լուկաշենկոն:
Panorama.am
