«Սխալ խաղադրույք են կատարել». Ալիևը՝ Հայաստանի նկատմամբ Արևմուտքի միտվածության մասին
Ադրբեջանի ինքնիշխանության վերականգնումը, Հայաստանի եվրաինտեգրման ձգտումներն ու դրանց հետ կապված փոփոխությունները քաղաքական գործիչներից և փորձագետներից պահանջում են նորովի նայել տարածաշրջանին։
Այս մասին, «Մեդիայի առաքելությունը խաղաղության խթանման գործում. ճշմարտության վերականգնում և վստահության ամրապնդում» խորագրով Շուշիի IV գլոբալ մեդիա ֆորումի բացմանը հայտարարել է Ադրբեջանի նախագահ Իլհամ Ալիևը։
Ադրբեջանի նախագահի խոսքով՝ վերջին տարիներին Հարավային Կովկասը լուրջ փոփոխությունների է ենթարկվել։ Նա նշել է, որ տարածաշրջանի տրանսֆորմացիայի վրա ազդած առանցքային իրադարձություններից մեկը Երկրորդ ղարաբաղյան պատերազմն է, որը փոխել է նախկինում անփոփոխ համարվող բազմաթիվ իրողությունները։
«Առանց մշտական շփումների և ընթացիկ իրավիճակի ընկալման՝ դա անելը շատ դժվար կլինի, քանի որ Հարավային Կովկասի ընկալման նախկին մեթոդաբանություններն ամբողջությամբ հնացել են։ Սա արդեն լիովին այլ տարածաշրջան է՝ համեմատած հինգ տարի առաջվա հետ», — նշել է Ալիևը։
Նա հայտարարել է, որ տարածաշրջանում ի հայտ են եկել ազդեցության նոր կենտրոններ և տարբեր, երբեմն՝ հակադիր շահեր։ Միևնույն ժամանակ, նրա խոսքով, Հարավային Կովկասը քաղաքական, տնտեսական և տրանսպորտային առումներով դեռևս բավարար չափով համախմբված ու ինտեգրված չէ։
Ալիևը նաև հայտնել է, որ նախկինում եվրոպացի գործընկերների ուշադրությունն է հրավիրել այն իրավիճակի վրա, երբ արևմտյան երկրները, իր գնահատմամբ, ակնհայտ կողմնակալություն են ցուցաբերել Հայաստանի օգտին։
«Երբ Հայաստանը սկսեցին ներկայացնել գրեթե որպես տարածաշրջանի գլխավոր տրանսպորտային հանգույց, դա, իհարկե, մեծ տարակուսանք առաջացրեց։ Մի երկիր, որն ընդհանրապես որպես տարանցիկ պետություն գործելու փորձ չունի, հանկարծ դառնում է գլխավոր տրանսպորտային հանգույց։ Լիովին անհասկանալի է, թե ինչի վրա են հիմնված նման գնահատականները», — ասել է Ադրբեջանի ղեկավարը։
Նրա խոսքով՝ նման գնահատականները կապված են եղել քաղաքական դրդապատճառների և Հայաստանին արտաքին որոշակի խաղացողների կողմը քաշելու ձգտման հետ։
Ադրբեջանի նախագահը կոչ է արել հրաժարվել Հարավային Կովկասը որպես դիմակայության թատերաբեմ ընկալելուց և հայտարարել է, որ Բաքուն թույլ չի տվել իր երկրին ներքաշել աշխարհաքաղաքական հակամարտությունների մեջ։
«Այժմ, կարծում եմ, նույնը պետք է անեն նաև մեր հարևանները, ընդ որում՝ ոչ թե խոսքով, այլ գործով», — հայտարարել է Ալիևը։
Նա ընդգծել է, որ տարածաշրջանի կայունությամբ և զարգացմամբ շահագրգիռ պետությունները պետք է հարաբերություններ կառուցեն Հարավային Կովկասի բոլոր երկրների հետ։
Ալիևը նշել է տարածաշրջանի երկրների տնտեսական, քաղաքական, ռազմական, ժողովրդագրական և մյուս պոտենցիալների օբյեկտիվ գնահատման անհրաժեշտությունը։
«Միայն այդ դեպքում շեշտադրումները ճիշտ կդրվեն, և հերթական հիասթափությունը չի առաջանա այն պատճառով, որ դարձյալ «սխալ խաղադրույք են կատարել», — ընդգծել է Ադրբեջանի նախագահը։
