Բորիս Ջոնսոնը կհայտարարի Իրանի «միջուկային գործարքի» պահպանման կարեւորության մասին
Մեծ Բրիտանիայի ԱԳ նախարար Բորիս Ջոնսոնը մտադիր է Իրանի, Ֆրանսիայի, Գերմանիայի ԱԳ նախարարների եւ ԵՄ դիվանագիտության ղեկավարի հետ քննարկել Իրանի միջուկային ծրագրի կարեւորությունը աշխարհում անվտանգության շահերի շրջանակում:
Ինչպես «ՌԻԱ Նովոստի»-ին հայտնել են Միացյալ Թագավորության ԱԳՆ-ից, Ջոնսոնը Իրանի, Ֆրանսիայի, Գերմանիայի ԱԳ նախարարներ Մոհամմադ Ջավադ Զարիֆի, Ժան Իվ Լե Դրիանի, Զիգմար Գաբրիելի եւ ԵՄ դիվանագիտության ղեկավար Ֆեդերիկա Մոգերինիի հետ հանդպման կմեկնի հինգշաբթի:
«Մեծ Բրիտանիան մշտապես հայտարարել է, որ Իրանի միջուկային ծրագրի համաձայնագիրն առանցքային է, այն աշխարհն ավելի անվտանգ է դարձնում: Կենսականորեն կարեւոր է, որ մենք այս գործարքը պահպանելու համար շարունակենք աշխատել եվրոպացի գործընկերների հետ: Համաձայնագիրը անվտանգություն եւ բարգավաճում է ապահովում Իրանի ժողովրդի եւ ամբողջ աշխարհի համար: Եվ այս համատեղ շահերը դրված կլինեն Բրյուսելում մեր բանակցությունների հիմքում»,- նշված է Ջոնսոնի հայտարարության մեջ:
Դրա հետ մեկտեղ, Ջոնսոնը հիշեցրել է, որ Լոնդոնի եւ Թեհրանի միջեւ որոշ հարցերի առումով տարաձայնություններ կան, այդ թվում՝ Իրանի հրթիռային ծրագրի:
«Անդրադառնալով Իրանում տեղի ունեցած վերջին բողոքներին՝ ես Իրանի ԱԳ նախարար Զարիֆին կասեմ, որ օրենքի համաձայն խաղաղ ցույցերի իրավունքը ցանկացած իսկապես հաջողակ հանրության համար կենտրոնական է: Ես նաեւ կբարձրացնեմ մեր երկրների երկքաղաքացիություն ունեցող քաղաքացիների վերաբերյալ հյուպատոսական հարցերին վերաբերող թեման»,- նշել է Ջոնսոնը:
News.am
