Թուրքիայում հեղաշրջման գործով կձերբակալվի ևս 170 մարդ, այդ թվում՝ գործող զինվորականներ

Փետրվարի 20-ին Ստամբուլի հանրապետական դատախազությունը Թուրքիայում 2016-ի ռազմական հեղաշրջման հետաքննության շրջանակներում լիազորել է ձերբակալել ևս 170 մարդու, որոնց թվում կան նաև գործող և նախկին զինվորականներ: Այս մասին հայտնում է թուրքական պետական «Անադոլու» գործակալությունը:

Ըստ թուրքական T24 լրատվակայքի տվյալների՝ 170 կասկածյալից 144-ն են գործող զինվորական:

Դատախազության լիազորումից հետո Թուրքիայի անվտանգության գլխավոր տնօրինության (ոստիկանություն) ստորաբաժանումները կասկածյալներին հայտնաբերելու համար գործողություններ են սկսել երկրի 38 նահանգներում, այդ թվում նաև Ստամբուլում:

Փետրվարի 20-ի դրությամբ արդեն իսկ հայտնաբերվել և ձերբակալվել է 22-ի մարդ, որոնց թվում նաև գործող, թոշակառու և զինուժից հեռացված զինվորականներ:

Փետրվարի սկզբին Թուրքիայի Քոնյա նահանգի դատախազությունը լիազորել է ձերբակալել երկրի զինված ուժերի անձնակազմի ևս 120 մարդու, ովքեր մեղադրվում են Ֆեթուլլա Գյուլենի«կառույցի հետ կապ ունենալո և 2016-ի ռազմական հեղաշրջման փորձը կազմակերպելու համար»:

Ավելի վաղ հայտնի է դարձել, որ՝ Թուրքիայում 2016-ի ռազմական հեղաշրջման փորձին մասնակցելու և Ֆեթուլլա Գյուլենի «կառույցի» անդամ լինելու մեղադրանքով շուրջ 320 մարդ ցմահ ազատազրկվել է:

Հիշեցնենք, որ 2016-ի հուլիսի 15-16-ին Թուրքիայում տեղի է ունեցել ռազմական հեռաշրջման փորձ, որից հետո երկրում սկսվել են ձերբակալություններն ու պաշտոններից հեռացումները: Բացի այդ, 2016-ի հուլիսից Թուրքիայում «արտակարգ դրություն» է հայտարարվել, որը շարունակվում է մինչև այժմ: