ԵՄ-ն ողջունել է Թուրքիայում արտակարգ դրության ռեժիմի դադարեցումը
Եվրամիությունը ողջունել է արտակարգ դրության ռեժիմը դադարեցնեու Թուրքիայի կառավարության քայլը: Այս մասին հաղորդում է Անատոլու լրատվական գործակալությունը:
ԵՄ արտաքին քաղաքականության և անվտանգության հարցերով գերագույն հանձնակատար Ֆեդերիկա Մոգերինին տարածել է հայտարարություն, որում նշել է.«Թուրքիայում արտակարգ դրության դադարեցումը դրական քայլ է»:
«ԵՄ-ն ողջունում է արտակարգ դրության ռեժիմի դադարեցումը: Միևնույն ժամանակ մենք հավատում ենք, որ նոր օրենսդրական առաջարկների ընդունումը, որոնք իշխանություններին կօժտեն արտակարգ լիազորություններով և արտակարգ դրության մի շարք սահմանափակող տարրերի պահպանումով, կթուլացնի դրա դադարեցման ցանկացած դրական հետևանք». նշվել է հայտարարության մեջ:
«Արտակարգ դրության դադարեցման հետ կապված մենք ակնկալում ենք նաև, որ Թուրքիան չեղյալ կհայտարարի բոլոր միջոցառումները, որոնք շարունակում են բացասական ազդեցություն ունենալ օրենքի գերակայության, դատական համակարգի անկախության և հիմնարար ազատությունների վրա», ընդգծել է Մոգերինին:
Հուլիսի 18-ին Թուրքիայում ավարտվել է երկու տարի առաջ սահմանված արտակարգ դրության ժամկետը:Նախատեսվում է այն փոխարինել մեկ այլ նախագծով:
