Գերմանացի պատգամավորին մեղադրում են Ադրբեջանից կաշառք ստանալու մեջ
Բունդեսթագի պատգամավոր Կարին Շտրենցը, ով նաև Եվրոպայի խորհրդի խորհրդարանական վեհաժողովի անդամ է, մեղադրվում է Ադրբեջանից անուղղակիորեն կաշառք ստանալու մեջ:
Ինչպես գրել է գերմանական Deutsche Welle պարբերականը, Բունդեսթագի պատգամավոր և Եվրախորհրդի խորհրդարանական վեհաժողովի անդամ Կարին Շտրենցը մեղադրվում է Ադրբեջանից անուղղակիորեն կաշառք ստանալու մեջ:
Եվրախորհրդի խորհրդարանական վեհաժողովն ավելի վաղ անդամ երկրների, այդ թվում Գերմանիայի պաշտոնատարներին կոչ էր արել հետամուտ լինել Շտրենցի կաշառակերտության գործին:
ԵԽԽՎ-ի սեփական անկախ քննիչ մարմնի՝ IBAC-ի 2018-ի ապրիլին հրապարակած զեկույցում, ԵԽԽՎ-ի տասնյակ անդամների անուններ կային: Նրանց թվում էր Քրիստոնեա-սոցիալական կուսակցությունից նախկին պատգամավոր և ԵԽԽՎ-ի նախկին անդամ Էդուարդ Լինտները, որին համարում են Ադրբեջանի «առանցքային լոբբիստ»:
Ըստ ԵԽԽՎ-ի սեփական անկախ քննիչ մարմնի հրապարակած զեկույցի, հենց նա է Բաքվի օգտին լոբբիստական աշխատանքում ներգրավել Կարին Շտրենցին:
Եվրախորհրդի խորհրդարանական վեհաժողովի որոշ անդամներ 2013 թվականի հունվարին Ադրբեջանի կառավարությունից ստացել են բազում նվերներ՝ խավիարի, գորգերի, ոսկերչական զարդերի և Բաքվի շքեղ հյուրանոցներում կեցության տեսքով, որպեսզի դեմ քվեարկեն այդ երկրում քաղբանտարկյալների վիճակի մասին հնչող քննադատություններին:
