د لبنان ترهګریزه پیښه، د لوېدیځو هېوادونو لپاره د شرم خبره ده
د ایران د اسلامي جمهوریت ولسمشر په لبنان کې ترهګریزه پېښه د لوېدیځو هېوادونو په تېره بیا د امریکا لپاره د شرم خبره وبلله.
د ایران د اسلامي جمهوریت ولسمشر مسعود پزشکیان د چهارشنبې په ورځ د ایران د حکومت په غونډه کې په لبنان کې د سه شنبې ورځې پېښو ته په اشارې سره، دغه ډول پېښې د لوېدیځو هېوادونو په ځانګړې توګه د امریکا لپاره د شرم خبره وګڼله، چې د خپلو غیر انساني اهدافو د پرمخ وړلو لپاره له هر ډول امکاناتو څخه کار اخلي.
پزشکیان څرګنده کړه: دا چې هغه وسیلې چې په دودیز ډول د انسانانو د هوساینې لپاره رامنځته شوي د هغه چا پروړاندې د وحشت او ویجاړۍ د وسیلې په توګه کارول کېږي چې نظرونه یې زموږ سره همغږي نه دي ، د انسانیت د زوال او وحشيتوب او جنایت د غلبې ثبوت دی.
د ایران د اسلامي جمهوریت ولسمشر زیاته کړه: دې پېښې یو ځل بیا وښودله چې که څه هم لوېدیځ هېوادونه او امریکایان په ظاهره ادعا کوي چې د اوربند په لټه کې دي، خو په عمل کې د صهیونیسټي رژیم له جنایتونو، وژنو او ړندو وژنو څخه په بشپړه توګه ملاتړ کوي.
د لبنان حزب الله د سه شنبې په ورځ (د ۲۰۲۴م کال د سپټمبر ۱۷مه) په یوه بیانیه کې اعلان وکړ: د پیغام تر لاسه کولو یو شمېر وسایل «پیجر» چې د حزب الله د مختلفو واحدونو او بنسټونو د یو شمېر کارکوونکو لخوا کارول کېدل، د صهیونیسټي رژیم لخوا په یوه ترهګریز عمل کې وچول شول.
د لبنان د روغتیا وزارت د تازه راپور له مخې، په دغه ترهګریز عمل کې ۱۲ کسان شهیدان او څه دپاسه درې زره نور ژوبل شوي دي.
