په تهران کې د جرمني سفیر احضار شو
په جرمني کې له قونسلي خدماتو څخه د ایراني اتباعو د محرومیت په تړاود جرمني د بهرنیو چارو د وزیرې د غیر عادلانه پریکړې په اعتراض کې، په تهران کې د جرمني شارژدافیر د ایران د بهرنیو چارو وزارت ته احضار شو.
د سحاب شبکې د خبر له مخې، د آلمان د بهرنیو چارو وزیرې آنالنا بائربوک د جمشید شارمهد (د تندر ترهګرې ډلې د مشر) د اعدام په غبرګون کې، په فرانکفورت، هامبورګ او مونیخ کې د ایران د اسلامي جمهوریت درې قونسلګرۍ وتړلې.
د جرمني د بهرنیو چارو د وزیرې له غیر منطقي پریکړې وروسته، په تهران کې د جرمني د سفارت شارژدافیر هانس پیټر یوګل د پنجشنبې په ورځ د ایران د بهرنیو چارو د وزارت د لوېدیځې اروپا د مشر لخوا یاد وزارت ته احضار او د ایران سخت اعتراض هغه ته ورکړل شو.
د جرمني شارژدافیر ته ویل شوي چې په جرمني کې میشتو ایرانیانو ته د اړینو قونسلي خدمتونه برابرول او د هغوی د ګټو ملاتړ کول د کوربه هېواد پر غاړه دي او د دغو مرکزونو د تړلو لپاره د آلمان د حکومت پریکړه په قصدي ډول له قونسلي اسانتیاوو او خدماتو څخه د ایرانیانو محرومول دي.
د ایران د اسلامي جمهوریت د بهرنیو چارو وزارت، د جرمني د بهرنیو چارو د وزیرې دغه اقدام مسخره، مداخله کوونکی، غیر مسلکي او له نزاکته لیري بللی او هغه له هر ډول اساس او قانوني ارزښت څخه بې اعتباره ګڼي.
