د ایران او پاکستان د ملګرتیاو په پراختیا تاکید
په ایران کښې د پاکستان سفیر په مختلفو زمینو کښې د دواړو هېوادونو د ملګرتیاو د پراختیا غوښتنه وکړه.
د اېسنا خبری اژانس د رپوټ له مخې په ایران کښې د پاکستان سفیر آصف علی خان درانی چې د ایران چابهار ته یې سفر کړے دے وویل، د پاکستان اقتصادی پلاوے به له ایران څخه د برېښنا د وارداتو په اړه د سلامشورو لپاره په راتلونکې میاشت کښې تهران ته سفر وکړی.
هغۀ د دواړو هېوادونو ترمېنځ د برېښنا او انرجۍ د ګډو طرحو اجرا ته په اشارې سره پینځو میلیارډ ډالرو ته د تهران او اسلام آباد د مبادلاتو په زیاتېدو تاکید وکړ.
آصف علی خان درانی همدارنګ زیاته کړه، پاکستان له ایران سره اتلس کاله وړاندې په پاکستان کښې د چاڼ ځاے د جوړولو لپاره د موافقې د تعقیب په حال کښې دے.
په تهران کښې د پاکستان سفیر د چابهار او کراچۍ د سمندری نېغ په نېغه لائن شروع کولو په باره کښې هم وویل، پاکستان د دغه سمندری لائن د شروع کولو لپاره د ایرانی خوا ځواب ته سترګې په لاړه دے.
---------
