په خېبرپښتونخوا کې ډینګی تبې تر دې دمه ۳۳ کسان وژلی دی
د خیبر پښتونخوا د روغتیا ایالاتی اداره وایی چې په دې ایالت کې له تیرې یوې میاشتې راهیسې د ډینګی تبې له امله د وژل شوېو شمیر ۳۳ ته رسیدلی دی.
د یادې ادارې له خوا په خپاره شویو معلوماتو کې راغلی چې د مړو شمیر د شنبې په ورځ هغه وخت ۳۳ ته ورسیده؛ چې د پیښور د تهکال یوه ۵۰ کلن اوسیدونکی او یوه ۱۰ کلن ماشوم د یادې ناروغۍ له امله په حیات اباد میډیکل کمپلیکس او خیبر ټیچنګ روغتون کې ساه ورکړه.
د روغتیا ادارې د ډینګی مخنیوی څانګې د معلوماتو له مخې، دا مهال د خیبرپښتونخوا په بیلابیلو روغتونونو کې نیږدې ۳۹۴ کسان چې په دغه ناروغۍ اخته دی، تر درملنې لاندې دی چې د ډېرو روغتیایی وضعیت ډاډمن بولی.
د ډاکټرانو په وینا، ډینګی یوه خطرناکه تبه ده، چې د یوه ځانګړی ماشی د چیچلو له امله رامنځته کیږی، او که د ناروغ پر وخت درملنه ونه شی، نو له خولې او پوزې یې د وینې بهیدل پیلیږی او ناروغ د مرګ حد ته رسوی.
که څه هم په لومړی سر کې ډېنګی واېرس تر ټولو زیات کسان د پیښور په تهکال سیمه کې ناروغان کړی ؤو، خو بیا وروسته دغه واېرس د پیښور نورو سیمو ته هم خور شو او ګڼ شمیر خلک یې اخته کړل.