په آسټرلیا کې درې امریکايي سمندري پوځیان وژل شوي
په آسټرلیا کې د پوځي تمرینونو پر مهال د الوتکې غورځېدو په پېښه کې درې امریکايي پوځیان وژل شوي دي.
د کلید ګروپ د خبر له مخې، د سرچینو د معلوماتو په حواله دا پېښه تېره ورځ د آسټرلیا ډاروېن ټاپو ته پر لاره د « ایم وي ۲۲» الوتکې د غورځېدو له امله رامنځته شوې چې په پایله کې یې ۲۰ نور سمندري پوځیان ټپیان شوي دي.
ویل کېږي چې د ټپیانو روغتیايي وضعیت د ډاډ وړ نه دی.
یادو پوځیانو د (پرېډاټور ځغاستې) په نامه په هغو تمرینونو کې برخه اخیستې وه چې د امریکا، اسټرالیا، فیلیپین، ختیځ تیمور او اندونیزیا ۲۵۰۰ پوځیان پکې ګډون لري.
په ورته مهال د آسټرلیا دفاع وزارت هم پر دې پېښه خواشیني څرګنده کړې ده.
د یادونې وړ ده چې دا په تېره یوه میاشت کې دویمه دا ډول پېښه ده چې په آسټرلیا کې رامنځته کېږي.
تر دې وړاندې څلور آسټرلیايي پوځیان د جولای په ۲۹ مه د کوېینز لینډ ساحل ته څېرمه د الوتکې غورځېدو په پېښه کې وژل شوي وو.
