د حضرت زینب(س) د ولادت کلیزه مو مبارک شه
نن د جمادي الاول د میاشتې پنځمه نیټه د حضرت زینب کبری(س) د نیکمرغه زوکړې کلیزه ده
بي بي زینب(س) په ټولو زمانو کښې د ټولو پتمنو او له ظلم سره د مقابله کونکو ټولو ښځو او سړیو لپاره د یو مثال او بیلګې په توګه مطرح ده. دوي د خپل ګران ورور حضرت امام حسین علیه السلام ترڅنګ له هغه متحجر او بې لارې بهیر سره مبارزه وکړه چې د اسلام د دفاع په نوم یې د کربلا ستره غمیزه رامینځته کړه.
بي بي زینب(س) په پرون، نن او سبا پورې اړونده میرمنه ده ځکه چې انساني کرامت، د خدای بندګي، عدالت او انصاف غوښتنه او شرافت او پتمني هغه ارزښتونه دي چې په یو خاص پړاؤ یا ځانګړې ټولنې پورې اړونده نه دي.
دغې عظیمې بي بي د خپل ګران ورور حضرت امام حسین علیه السلام له شهادت وروسته د څلورم معصوم امام او د خپل وراره امام سجاد علیه السلام د ژوند ساتنه خپله وظیفه بلله په هم دې وجه په ډیرو سختو حالاتو کښې هم د جنایتکارانو او ظالمانو مخې ته اودریده او له هغه حصرت سره اوږه په اوږه یې په خپلو سختو ویناو سره د اسلام دښمنان رسوا کړل.
د ایران د اسلامي جمهوریت په کال هینداره کښې د حضرت زینب سلام ا... علیها د زوکړې کلیزه، د نرسانو ورځ نومول شوې ده.
نو مونږ هم د تهران راډیو په استازیتوب د اسلام د دغې سترې او اتلې بي بي د نیکمرغه ولادت په مناسبت مبارکي وايو.
