ترکیه له ایران سره په ګډه پوله کښې دیوال وهي
د ترکیې د وزاعظم دفتر ته نزدې سرچینو له ایران سره د دغه هیواد په ګډه پوله کښې د ۱۴۴ کیلومیټري دیوال جوړولو د عملیاتو د پیلیدو خبر ورکړ.
د العالم چینل د رپورټ له مخې د ترکیې د وزیراعظمۍ په دفتر پورې پیئلې د استوګنې د تاسیساتو د ادارې مشر اناتولي خبري آژانس ته په مرکه کښې وویل: په ایګدیر او آغري ولایتونو کښې د ایران او ترکیې په ګډو پولو کښې ۱۴۴ کیلومیټره اوږد دیوال جوړیږي.
ارګون توران دې ټکي ته په اشارې سره چې له ایران سره د ترکیې په پوله کښې د دیوال جوړولو پروژه به په پنځو مرحلو کښې جوړه شي، زیاته کړه: د دې دیوال د جوړیدو وړومبی پړاو به تر کابو څلورو میاشتو بشپړ شي.
په یاد دیوال کښې پنځلس ځایونه د اوړیدو لپاره په نظر کښې نیول شوي دي.
هغه دې ټکي ته په اشارې سره چې د دې دیوال لوړوالي درې میټره دی، وویل: دا دیوال له یوځایه بل ځاې ته د وړلو وړ دی او له کنکریټو جوړیږي.
ایران او ترکیه ۵۵۰ کیلومیټره ګډ سرحد لري.
د ترکیې دغه چارواکي په عین حال کښې وویل چې له سوریې سره د ترکیې په ګډه پوله کښې هم یو دیوال جوړیږي.
