Kosova ndalon hyrjen e automjeteve me targa serbe

Pasi Serbia arrestoi tre policë të Kosovës, Prishtina të mërkurën si masë sigurie vendosi të ndalojë hyrjen e veturave me targa serbe në Kosovë.

Sipas agjencisë së lajmeve Anatolia, tensionet mes Serbisë dhe Kosovës po rriten ndërsa Beogradi dhe Prishtina po ndërmarrin hapa ekstremë për arsye sigurie. Zëdhënësi i Qeverisë së Kosovës, tha: “Për arsye sigurie, institucionet e Kosovës kanë vendosur të rrisin nivelin e kontrolleve kufitare, ndaj si masë urgjente në Kosovë është vendosur ndalimi i hyrjes së automjeteve me targa serbe”. Më herët mediat kosovare kanë raportuar se qeveria ka ndaluar edhe importin e mallrave nga Serbia. Nga ana tjetër, ministri i Jashtëm i Serbisë, Nemanja Staroviq, në lidhje me këtë tha: Kryeministri i Kosovës, Albin Kurti, duke lëshuar një urdhër për ndalimin e hyrjes së produkteve serbe, po shkel disa marrëveshje, duke përfshirë edhe Marrëveshjen e Tregtisë së Lirë të Evropës Qendrore (CEFTA). Ai shtoi: Ky aksion është kundër serbëve që jetojnë në veri të Kosovës, të cilët të gjitha sendet elementare ushqimore dhe mjekësore i sigurojnë nga Serbia dhe një veprim i tillë i paligjshëm, nëse zbatohet, mund të çojë në një fatkeqësi humanitare. Sipas agjencisë së lajmeve Anatolia, Serbia të mërkurën arrestoi tre policë të Kosovës për gjoja planifikimin e kryerjes së një akti të paligjshëm në Serbi. Ministria e Brendshme serbe tha se oficerët ishin të armatosur me armë automatike dhe pajisje të plota luftarake dhe u arrestuan nga njësitet speciale antiterroriste të policisë serbe. Ata mbanin pajisje GPS, harta dhe pajisje të tjera. Duke reaguar ndaj masës, Albin Kurti  tha se oficerët e policisë ishin rrëmbyer nga Serbia dhe bëri thirrje për lirimin e menjëhershëm të tyre, ndërsa u bëri thirrje vendeve të tjera të dënojnë arrestimin e këtyre policëve. Ndërkohë, Bashkimi Evropian ka bërë të ditur se ndaj Kosovës do të zbatohen masa ndëshkuese nëse kriza e Kosovës dhe serbëve që jetojnë atje nuk zgjidhet. Bashkimi Evropian ka thënë se nëse Kosova nuk i ndal veprimet agresive kundër serbëve në rajon, Bashkimi Evropian mund të ndalojë ndihmën financiare për Prishtinën. Ndërprerja e programit për udhëtime pa viza ndërmjet Kosovës dhe vendeve evropiane është një nga masat e tjera që po shqyrton Bashkimi Evropian kundër Prishtinës nëse nuk zgjidhet tensioni mes Kosovës dhe serbëve që jetojnë atje. Javën e kaluar, trazirat në veri të Kosovës u ndezën përsëri pasi zyrtarët e zgjedhur shqiptarë etnikë hynë në ndërtesat komunale për të punuar në rajonet me shumicë serbe. Serbët i kishin bojkotuar zgjedhjet lokale në veri të Kosovës, por zgjedhjet u mbajtën dhe kandidatët shqiptarë mundën të fitonin.  Serbët vendas kanë mbështetjen e Beogradit dhe kanë deklaruar se nuk i njohin kryetarët shqiptarë.