Situatë e qetë në Banjskë pas sulmit terrorist

Një ditë pas ngjarjeve të djeshme mes pjesëtarëve të Policisë së Kosovës dhe grupeve terroriste serbe, ku pati të vrarë, të plagosur dhe të arrestuar, situata e përgjithshme në Banjskë të Zveçanit sot është e qetë dhe pa tensione.

Një autoblindë me policë është duke qëndruar tek udhëkryqi i rrugës që të çon në drejtim të manastirit të Banjskës, aty ku u zhvilluan luftimet të dielën, ndërsa askush nuk po lejohet të lëvizë në këtë drejtim, duke përfshirë këtu edhe gazetarët. Mësohet se operacionet e policisë në kërkim të terroristëve në këtë zonë po vazhdojnë. Automjetet e EULEX-it, sikur edhe ato të Policisë së Kosovës, e nganjëherë edhe të KFOR-it, janë duke e frekuentuar vazhdimisht këtë pjesë të veriut të vendit, ndërsa gjatë ditës është vërejtur edhe një helikopter i KFOR, duke vëzhguar situatën nga ajri. Policia ende nuk ka arritur të marrë kontrollin e plotë brenda manastirit të Zveçanit, kështu që dyshohet se aty mund të ketë akoma terroristë, qoftë të plagosur apo edhe të vrarë. Policia e Kosovës sot gjatë një konference për media, ka prezantuar arsenal armesh e pajisjesh tjera, përfshirë automjete të kamufluara të KFOR, uniforma, harta, monedha eurosh, ushqime e medikamente, dhe shumë pajisje tjera ushtarake, që posedonte grupi i armatosur të dielën në fshatin Banjskë.