Hezbollah: Të gjitha objektivat e ndjeshme izraelite janë brenda rrezes
Mes kërcënimeve të përsëritura të regjimit izraelit për të zhvilluar një luftë kundër Libanit, Hezbollah deklaroi se nisja e një aksioni të tillë ushtarak kundër Libanit nuk do ta ndihmonte Tel Aviv-in të kompensonte humbjet e tij.
Zëvendëskryetari i Këshillit Ekzekutiv të Hezbollahut, Sheikh Nabil Kauk, i bëri komentet të hënën, raportoi gazeta libaneze Elnashra.
“Libani nuk do të shërbejë për Izraelin si një vend ku mund të kompensojë humbjet e tij. Libani do të mbetet edhe më tej një arenë për humbjen e armikut sionist dhe një vend për fitore kundër regjimit izraelit”, tha ai.
“Raketat dhe dronët e rezistencës janë në gjendje të arrijnë objektivat e tyre të ndjeshme kudo që rezistenca dëshiron”, shtoi zyrtari i Hezbollahut.
Ushtria izraelite tha se kishte miratuar planet për një sulm ndaj Libanit, duke ngritur shqetësime se regjimi izraelit mund të përpiqet të realizojë kërcënimet e tij të përsëritura për ta kthyer Libanin në një Gazë tjetër.
Sheikh Nabil Kauk, megjithatë, tha se natyra e kërcënimeve izraelite tregonte "dëshpërimin dhe dobësinë e regjimit sionist, jo fuqinë e tij".
“Këto kërcënime nuk shërbejnë për të garantuar regjimin sionist, por përkundrazi e zhytin armikun në një det frike”, tha ai, duke shtuar: “Zyrtarët e lartë të armikut kërcënojnë me luftë, por në realitet, ata po dridhen nga frika.”
