Pretendimi i ri i presidentit amerikan për Iranin

Presidenti i Shteteve të Bashkuara, i cili udhëtoi drejt Italisë për të marrë pjesë në samitin e G20, ka bërë një pretendim të ri për Iranin dhe marrëveshjen bërthamore, por pa përmendur tërheqjen e paligjshme të Shteteve të Bashkuara nga kjo marrëveshje.

Sipas agjencisë së lajmeve Fars, në prag të një takimi me liderët e Gjermanisë, Francës dhe Britanisë, presidenti amerikan Joe Biden, në përgjigje të një pyetjeje se kur do të rifillonin bisedimet e Vjenës, pretendoi se Irani duhet të rifillonte këto bisedime. Deri më tani në Vjenë janë zhvilluar gjashtë raunde bisedimesh me pjesëmarrjen e vendeve të mbetura në marrëveshje, me qëllim kthimin e Shteteve të Bashkuara në marrëveshjen bërthamore. Në këtë drejtim, Teherani është shprehur se heqja e të gjitha sanksioneve të njëanshme dhe të paligjshme nga Uashingtoni dhe verifikimi i heqjes së tyre do të jetë kusht për arritjen e një marrëveshjeje në këtë drejtim. Një fushë e mosmarrëveshjes në bisedime është këmbëngulja e SHBA për të ruajtur disa nga sanksionet e vendosura ndaj Iranit nga administrata e ish-presidentit Donald Trump pas largimit nga marrëveshja bërthamore. Përveç kësaj, administrata e presidentit amerikan Joe Biden ka deklaruar se nuk mund të garantojë që administrata e ardhshme amerikane nuk do të tërhiqet nga marrëveshja bërthamore. Republika Islamike e Iranit ka theksuar se, duke qenë se Shtetet e Bashkuara kanë qenë palë në marrëveshje, është Uashingtoni që duhet t'i kthehet marrëveshjes duke hequr sanksionet dhe se zbatimi i detyrimeve të SHBA-së duhet të verifikohet. Teherani, natyrisht, ka theksuar se nuk ka nxitim për t'i kthyer Shtetet e Bashkuara në marrëveshje.