Ministri i Jashtëm i Iranit bisedon me homologun polak

Ministri i Jashtëm i Iranit tha se qëllimi kryesor i ndjekur nga Irani gjatë bisedimeve të ardhshme me palët e mbetura në marrëveshjen  bërthamore është të sigurojë heqjen e të gjitha sanksioneve të paligjshme të vendosura ndaj Iranit.

Hossein Amir-Abdollahian i bëri komentet të enjten në një telefonatë me homologun e tij polak, Zbigniew Rau, gjatë së cilës të dy palët diskutuan marrëdhëniet dypalëshe si dhe zhvillimet rajonale dhe ndërkombëtare. Gjatë bisedës telefonike, kryediplomati i Iranit theksoi se qëllimi kryesor i ndjekur nga Teherani përmes pjesëmarrjes në bisedimet e ardhshme në kryeqytetin austriak, Vjenë, është heqja e të gjitha sanksioneve të paligjshme të vendosura ndaj Iranit nga Shtetet e Bashkuara pas tërheqjes së Uashingtonit nga marrëveshja bërthamore.  “Të gjithë pjesëmarrësit në bisedimet e Vjenës kanë arritur në mirëkuptimin e përbashkët se Shtetet e Bashkuara janë pala kryesore që duhet fajësuar dhe është përgjegjëse për gjendjen aktuale,” shtoi Amir-Abdollahian. Gjatë bisedës telefonike, Amir-Abdollahian falënderoi gjithashtu Poloninë për dhurimin e një milion dozave të vaksinës kundër koronavirusit në Iran, duke thënë se ky veprim ishte një shembull i marrëdhënieve humanitare midis dy vendeve. Ai tha se pavarësisht sanksioneve çnjerëzore të Shteteve të Bashkuara, Irani ka mbuluar më shumë se katër milionë refugjatë afganë në përpjekjen e tij të vaksinimit, duke theksuar se vendi i tij mirëpret çdo iniciativë nga vendet e tjera, veçanërisht Polonia, për të ndihmuar popullin afgan, përfshirë refugjatët që nuk janë në kushte të mira këto ditë. Ministri i Jashtëm polak, nga ana e tij, shprehu vendosmërinë e vendit të tij për të përmirësuar më tej marrëdhëniet Teheran-Varshavë.