Irani i kërkon Azerbajxhanit dhe Armenisë të ushtrojnë vetëpërmbajtje

Irani ka shprehur shqetësim për përplasjet e fundit kufitare midis Azerbajxhanit dhe Armenisë, duke u kërkuar dy fqinjëve të ushtrojnë vetëpërmbajtje dhe në përputhje me ligjin ndërkombëtar të gjejnë një zgjidhje paqësore për mosmarrëveshjet e tyre.

Zëdhënësi i Ministrisë së Jashtme iraniane Naser Kanani tha të martën se Irani nuk do të pranonte asnjë ndryshim në kufijtë gjeografikë midis Azerbajxhanit dhe Armenisë. Ai tha se Irani monitoron nga afër të gjitha zhvillimet në lidhje me këtë çështje dhe nënvizoi nevojën për të respektuar integritetin territorial të të dy vendeve. Kanani shprehu gjithashtu gatishmërinë e Teheranit për të ndihmuar dy shtetet kaukaziane të zgjidhin mosmarrëveshjet e tyre përmes kanaleve paqësore. Ministria e Mbrojtjes e Azerbajxhanit njoftoi në orët e para të së martës se një numër i forcave të saj janë vrarë në shkëmbimin e zjarrit me forcat armene përgjatë kufirit të dy vendeve. Ajo akuzoi Armeninë për "akte subversive në shkallë të gjerë" pranë rajoneve kufitare Dashkesan, Kelbaxhar dhe Lachin. Kryeministri armen, Nikol Pashinyan tha të martën se të paktën 49 trupa armenase u vranë në përleshjet me Azerbajxhanin, luftimet më të ashpra midis armiqve të përhershëm që nga lufta e tyre në vitin 2020 mbi rajonin e diskutueshëm të Nagorno-Karabakut.